Agresións aos petróglifos de Outeiro do Corno, en Teo / Concello de Teo

Novas agresións a petróglifos en Teo

Tempo de lectura: 2 min.

O Concello de Teo denunciou ante a Garda Civil unha agresión aos petróglifos das zonas do Outeiro do Corno, situado en Regoufe (Luou) e de Río Angueira, en Cornide (Calo). Uns petroglifos que o colectivo A Rula ten posto en valor nos últimos tempos. O dano máis grave, probablemente irreparable, produciuse no primeiro lugar, onde alguén raiou con pedra unha cruz, xusto a uns centímetros dunha figura zoomorfa. A pedra coa que fixo os riscos quedou xusto ao pé do panel.

Nos dous casos, distintas estacións de figuras rupestres foron marcadas con xiz. “Este feito, sendo menos grave que o debuxo da cruz, constitúe tamén un dano inadmisible sobre o patrimonio histórico”, denuncia o concello. É probable que alguén o fixese para realzar os trazos dos petróglifos e tomar fotografías, pero hai que ter en conta que esta práctica, de xeito continuado, a medio prazo ocasiona unha deterioración e unha alteración sobre estes elementos, de vital importancia para a comprensión da nosa Historia e as nosas raíces culturais.

Agresións aos petróglifos de Outeiro do Corno, en Teo / Concello de Teo

Agresións aos petróglifos de Outeiro do Corno, en Teo / Concello de Teo

Os feitos chegaron ao coñecemento do Concello esta semana a través dun particular que efectúa excursións periódicas pola zona. O cidadán tamén informou á Brigada de Patrimonio Histórico da Policía Nacional. Estímase que a agresión se puido producir a finais do mes de xuño.

O Concello de Teo reitera a necesidade de respectar e preservar os petróglifos. O feito de que estes elementos estean ao aire libre non debe servir para que se perpetren este tipo de agresións. Ao contrario, é unha razón máis para reforzar o seu coidado e protección por parte dos visitantes. Por iso, está prohibido tocalos e moito menos manipulalos.

O goberno de Teo pide a colaboración cidadá para tratar de identificar os responsables deste agresión e empraza a poñer en coñecemento do Concello calquera movemento sospeitoso ou calquera información que sirva para axudar nas investigacións que abran as forzas de seguridade.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Informe de erros

O seguinte texto será enviado aos nosos editores: