Un novo libro explora o patrimonio musical da catedral de Tui
Un novo volume difunde o patrimonio musical do arquivo da catedral de Tui, a través dun disco con obras do mestre de capela Matías García Benayas e dun libro coas partituras correspondentes, que acaban de ver a luz co apoio da Consellería de Cultura.
Para dar a coñecer este traballo –que se presenta baixo o título, no caso do libro, de ‘Matías García Benayas. Motetes, tractos e himnos’, e, no do disco, de ‘Salvete flores. Obras de García Benayas. Libros de polifonía e canto chan– están previstos dous concertos do grupo Vox Stellae para os días 16 de setembro, ás 19:00 horas, na catedral de Tui, e para o 23 de setembro, ás 20:30 horas, na capela das Ánimas de Santiago de Compostela.
A publicación do libro e a gravación do disco enmárcase nun proxecto de recuperación do patrimonio musical da catedral de Tui, iniciado en 2013 coa obra de Matías García Benayas, a través do disco ‘Defensor alme Hispaniae’ e da publicación dos ‘Magnificats’ e a ‘Missa defensor alme’. Xunto coas dese primeiro volume, as obras publicadas no novo libro comprenden case toda a obra que se conserva deste mestre de capela que chegou á sede tudense a finais do século XVII.
Joám Trilho atribúelle a este mestre de capela a creación de practicamente todas as obras que conforman este novo volume, incluíndose unicamente dúas pezas anónimas e outra, ‘Domine, quando veneris’, de autoría dubidosa.
Recuperar e difundir o legado musical
“Esta recuperación do patrimonio cultural da catedral de Tui responde a un labor continuo que desde hai anos algunhas das voces máis especializadas coas que contamos en Galicia veñen desenvolvendo con auténtica dedicación persoal e constancia”, asegurou hoxe o secretario xeral de Cultura, Anxo Lorenzo, na rolda de prensa de presentación destes materiais promovidos polo bispado de Tui-Vigo. Ao tempo, o representante da consellería felicitou o labor do compositor e musicólogo Joám Trilho polo estudo e edición dos materiais, e ao grupo Vox Stellae pola interpretación e gravación, xunto co traballo do párroco de Barcia de Mera, Rafael Antela, por impulsar este proxecto.
Nun acto no que tamén interveu o bispo de Tui-Vigo, Luis Quintero, o secretario xeral salientou a achega á cultura musical de Galicia realizada desde as catedrais polos mestres de capela, un labor que cualificou de “fundamental para entender a historia da nosa música nos últimos séculos. E aínda que xa coñecemos moito de como era ese oficio –engadiu–, é ben certo que queda nos arquivos das nosas catedrais moita música por recuperar e, sobre todo, moita música por difundir”.
Ademais do interese dos materiais desde a perspectiva histórica, Anxo Lorenzo tamén incidiu no seu valor en tanto que “constitúen unha achega máis á oferta musical do noso presente” e, nese sentido, apostou por “aspirar a que as nosas agrupacións integren nos seus repertorios, ao pé doutras grandes figuras universais da composición, as obras dos protagonistas do universo musical galego de todos os tempos”.