Conferencia sobre ‘O megalitismo’ en Marín
A Asociación Cultural Almuinha iniciará este venres o ciclo de conferencias ‘Francisco Carballo’ de Historia de Galicia coa charla ‘O megalitismo’, a cargo do arqueólogo Juan Carlos Castro Carrera, que terá lugar no Museo Manuel Torres de Marín.
Este ciclo de charlas sobre historia de Galicia levará o nome de Francisco Carballo para render unha “modesta homenaxe” a este marinense que “dedicou unha parte moi importante da súa vida ao coñecemento da historia de Galicia e á súa difusión”.
“Desde a nosa asociación partimos do convencemento de que o coñecemento do noso pasado, da historia do noso pobo, constitúe un elemento imprescindible para a comprensión do que somos hoxe e para entender o presente no que vivimos”, explicaron desde a A.C. Almuinha, que adianta que en próximas datas abordaranse outras cuestións de interese en relación á historia de Galicia.