Vistas do parque e do castelo de Soutomaior / Silvia Cernadas

Guerra aos eucaliptos en Pontevedra para evitar que danen lugares de interese patrimonial

Os eucaliptos son xa unha praga en determinadas partes de Galicia. Unha especie foránea que non só pon en perigo ás especies autóctonas, senón tamén sitios e lugares de interese patrimonial. Por iso, e para atallar ese problema de raíz, a Deputación de Pontevedra cortará todos os eucaliptos que estean dentro das 33 hectáreas de terreo do Castelo de Soutomaior.

O goberno provincial da Deputación de Pontevedra contratou a talla dos 333 exemplares desta “especie invasora” que están repartidas polas 25 hectáreas de explotación forestal que dispón o recinto do Castelo. A súa presidenta, Carmela Silva, anunciou quere que a área quede “libre” de eucaliptos.

As plantacións de eucaliptos son un dos maiores perigos aos que se enfronta o megalitismo galego / inter.rev.foroactivo.com

As plantacións de eucaliptos son un dos maiores perigos aos que se enfronta o patrimonio galego / inter.rev.foroactivo.com

Silva apuntou que este asunto é da “máxima relevancia” e unha mostra “de como entende esta Deputación o coidado do patrimonio ambiental”. “Estes eucaliptos non só impedían gozar das vistas que ten este privilexiado espazo, senón que ademais supoñen un grave perigo ambiental“, subliñou.

A presidenta explicou que estas árbores “non están protexidas, esquilman o chan e compiten moito pola luz, a auga e os nutrientes do solo en detrimento das especies autóctonas, que esas si que están protexidas”.

Propagan lumes e danan o patrimonio

Polas súas características singulares, os eucaliptos actúan como especie pirófaga que facilita a propagación dos incendios e danan o patrimonio. Por todas estas cuestións o goberno provincial considera que “vai ser moi beneficiosa a erradicación dos eucaliptos”, que constitúen “unha secuela para a natureza“.

Os traballos para levar a cabo a talla xa foron adxudicados á empresa Díaz e Buceta S.L., que ofreceu un importe de 34,24 euros por tonelada na mesa de contratación. Está previsto que a próxima semana, “se o tempo acompaña”, comece a talla, que terá unha duración estimada de dúas semanas.

As pezas de maior tamaño serán aproveitadas pola empresa e o resto serán destinadas á compostaxe. “Como responsable política eu síntome moi satisfeita destas decisións”, concluíu Carmela Silva.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Informe de erros

O seguinte texto será enviado aos nosos editores: