fbpx
Estudantes da Escola de Conservación e Restauración de Bens Culturais de Galicia que realizarán un proxecto de intervención arqueolóxica no Monte Carrio, no Deza

Estudantes piden axuda para realizar un proxecto de arqueoloxía participativa no Monte Carrio, no Deza

Tempo de lectura: 2 min.

Son seis estudantes da Escola de Conservación e Restauración de Bens Culturais de Galicia, cuxa vocación é a conservación do patrimonio cultural. É por iso que queren realizar un proxecto de intervención no conxunto arqueolóxico Monte Carrio, na Comarca do Deza, cunha bolsa do grupo Pascual. En total, piden 5.000 euros.

O obxectivo da súa intervención é crear un xacemento vivo, “creando na sociedade un instinto de conservación mediante actividades educativas e participativas”. Para iso, levarán a cabo unhas conferencias impartidas por diversos profesionais, uns talleres de arqueoloxía experimental e outra serie de actividades participativas nas que o asistente se converterá no protagonista.

Estudantes da Escola de Conservación e Restauración de Bens Culturais de Galicia nun traballo de campo

A axuda económica investirase nos materiais necesarios para realizar os talleres de arqueoloxía experimental e outros cursos, nos conferenciantes e profesionais que colaboren co proxecto e nos seguros e outros gastos administrativos. Tamén nas actividades lúdicas que amenicen as xornadas. a publicidade, mercadotecnia, páxina web, redes sociais e outros recursos relacionados coa difusión e na creación de produtos gráficos e sinalización dos conxuntos arqueolóxicos destacados en Monte Carrio.

Achega solidaria

“O noso proxecto levarase a cabo grazas á colaboración interdisciplinar entre profesionais, asociacións públicas e privadas, institucións de varias índoles e diversos colectivos creando así un tecido asociativo e colaborativo entre todas elas por ese obxectivo que todos temos en común: A defensa do patrimonio cultural”, indican na súa petición.

“Ademais a través das nosas actividades educativas e participativas obteremos un beneficio a nivel cultural, que é a defensa e difusión do patrimonio local. Por todo isto consideramos que a achega do noso proxecto é de gran importancia xa que abarca non só á sociedade vinculada de maneira máis directa a Monte Carrio se non a todos os colaboradores e implicados que se acaban de citar”, engaden.

Pode que che interese...