A Xunta convoca axudas para mellorar os arquivos de Galicia
A Xunta convoca axudas por máis de 77.000 euros para a mellora dos arquivos de Galicia, a fin de garantir “unha custodia responsable” e o acceso da cidadanía aos documentos.
Segundo precisou o Goberno galego a través dun comunicado, a finalidade desta liña de subvencións é realizar actividades de descrición dos fondos documentais para favorecer a súa protección e difusión.
Así, os concellos e as entidades privadas sen ánimo de lucro que conten cun local estable dedicado a arquivo e custodien fondos documentais do patrimonio documental teñen ata o próximo 12 de maio para solicitar estas axudas.
A Consellería de Cultura poderá financiar ata un 80 por cento do custo do proxecto, cunha axuda máxima de 5.000 euros ou de 7.000 euros cando sexan solicitudes conxuntas.