Unha das primeiras locomotoras do ferrocarril de Galicia / patrimoniovilagarcia.net
Unha das primeiras locomotoras do ferrocarril de Galicia / patrimoniovilagarcia.net

Queres coñecer como eran as primeiras axencias de viaxe?

Un estudo sobre a evolución e as características das axencias de viaxes do primeiro terzo do século XX, estatísticas sobre a demanda turística ou datos comparativos da situación na que se atopaba a industria turística en España e noutros países nas primeiras décadas do pasado século. Estes son algúns dos novos datos que permitirán afondar en como nestes anos se produciu a conformación dunha industria turística en España no I Congreso de Historia do Turismo, que se desenvolverá no Mosteiro de San Xoán de Poio entre o 6 e o 8 de xuño.

Expertos e expertas en historia, economía, xeografía, antropoloxía ou arquitectura protagonizan o programa de conferencias dun congreso que conta coa colaboración da agrupación estratéxica Ecobas e do grupo Ecosot da Universidade e que busca abordar o fenómeno turístico desde unha óptica multidisciplinar.

Entre os relatores, figuran expertos e expertas de diferentes universidades españolas, aos que suman tamén investigadores como a filóloga Kirsty Hooper, da universidade británica de Warwick, “especialista nas relacións culturais hispano-británicas” ou o hispanista Sasha Pack, da State University of New York.

O simposio está coordinado polo profesor da Facultade de Ciencias Económicas e Empresariais Rafael Vallejo e polo investigador da Universidad de Granada, Rafael Larrinaga, e contará coa participación de 24 especialistas en diferentes disciplinas co propósito de afondar no período no que se conforma o modelo turístico español.

Proxecto de investigación

O congreso, que mantén aberto o seu período de inscrición, de carácter gratuíto, insírese nun proxecto de investigación do grupo Turhis, coordinado por Larrinaga e financiado polo Ministerio de Economía y Competitividad, dirixido a analizar a historia do turismo en España ao longo do pasado século, do que forma parte á súa vez o proxecto coordinado por Vallejo para a elaboración da primeira historia do turismo en Galicia.

“Trátase dun congreso innovador desde o punto de vista metodolóxico”, salienta este investigador dunhas xornadas nas que os investigadores e investigadoras inseridos neste proxecto presentarán estudos realizados a partires do uso da prensa como fonte para a obtención de datos estatísticos do sector, que posteriormente serán recollidos, xunto coas achegas dos diferentes relatores e relatoras, nunha publicación que, sinala Vallejo, vai achegar “novas perspectivas e temas e investigar a partires destas novas metodoloxías”.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Deixa unha resposta

Informe de erros

O seguinte texto será enviado aos nosos editores: