Castro de Benquerencia, en Barreiros, utilizado como un aparcadoiro de autocaravanas / Mariña Patrimonio

A turistificación chega á Mariña; un castro convertido nun aparcadoiro en Barreiros

ADEGA e Mariña Patrimonio acaban de denunciar no SEPRONA a utilización do Castro da Punta de San Pedro de Benquerencia, no concello de Barreiros (Lugo), como aparcadoiro de autocarabanas.

Coches e caravanas aparcados xusto nun cartel que anuncia o Castro da Punta de San Pedro de Benquerencia / Mariña Patrimonio

Segundo suliñan estas entidades, o castro é un ben patrimonial incluído no catálogo das Normas Subsidiarias de Planeamento do Concello de Barreiros e a súa cualificación urbanística é de solo non urbanizable de protección patrimonial. “As Normas Subsidiarias de Planeamento do Concello de Barreiros outórganlle ao Castro de San Pedro unha proteccion que consideramos que non é compatible co uso que se lle está a dar actualmente como aparcadoiro de autocaravanas nin como lugar de tránsito destes vehiculos, posto que esta práctica pode estar provocando danos no xacemento, un ben patrimonial protexido”, denuncian.

A través dun comunicado din que as actividades que se están a realizar no Castro de San Pedro probablemente son contrarias á normativa urbanística e, ademais, poderían estarse levando a cabo sen contar coas correspondentes licenzas.

Por iso, piden que se comprobe se o uso que se está a dar  no Castro da Punta de San Pedro é conforme á legalidade e que, no caso de non selo, se paralicen as actuacións contrarias a Dereito nun ben patrimonial  incluído no catálogo de bens protexidos polo planeamento urbanístico.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Informe de erros

O seguinte texto será enviado aos nosos editores: