Estas son as interesantes sorpresas da nova campaña de escavacións do Castro das Barreiras
O pasado 2 de febreiro anunciábase a nova campaña. Os arqueólogos volverían ó Castro das Barreiras, no val de Vimianzo, un dos castros máis singulares da Costa da Morte. Anunciábao o director das escavacións, Tito Concheiro, o alcalde da capital de Soneira, Manuel Antelo, e a concelleira Marta Rey. Na nova campaña abriríase unha nova área de 16×18 metros que tería como singularidade aproximarse a súa muralla, unha das máis significativas do mundo castrexo.
Pouco máis de dúas semanas despois do anuncio, as escavacións xa se atopan avanzando a bo ritmo e, tal e como publicaba nas redes sociais do equipo de escavación, o pano de muralla que es está a escavar xa comeza a facerse visible. Tamén se está a intervir no entorno das dúas vivendas xa atopadas na escavación de 2018, que sorprendían ó equipo polo seu tamaño e que no seu momento non puideron ser sacadas por completo á luz.
Agora, unha vez máis, a escavación está a avanzar a bo ritmo, dando resultados que se irán coñecendo e novas pezas que se “irán mostrando”, como unha pedra aínda por definir tallada con glifos concéntricos ou un imporante anaco cerámico que conserva un borde profusamente decorado.
Tamén, e tal e como se fixo xa na campaña de 2018, o equipo quere divulgar o proxecto dende o primeiro momento, facendo unha gran actividade nas redes sociais. Durante esta campaña as escavacións estarán, tamén, abertas ao público coa posibilidade de organizar visitas guiadas ao xacemento.