A Maurilla Island, pertencente as Discovery Islands na Columbia Británica canadiense / google maps

A Maurelle, a illa de Canadá que leva o nome dun fascinante mariño galego

Tempo de lectura: 2 min.

Hai unha remota illa na Columbia Británica canadiense que levan o nome dun gran e descoñecido mariño galego; Francisco Mourelle de la Rúa. Un home humilde de Corme, fillo de pescadores, que foi quen de chegar a capitán de fragata cando esa honra só estaba reservada aos fillos dos ricos e dos nobres da España do século XVIII.

A Maurelle forma parte das illas Discovery (en inglés, Discovery Islands, que significa, «illas do Descubrimento»). Son un arquipélago de pequenas illas costeiras de Canadá, entre a illa de Vancouver e o territorio continental da Columbia Británica. O nome da illa, aínda que un pouco deturpado, recibiuno en 1903 polo Geographical Names Board of Canada, que quixo recoñecer así a labor deste gran mariño que foi o primeiro en navegar por estas augas a finais do século XVIII.

O diario que acabou en mans de Cook

En 1779, a bordo da fragata Favorita, remontou a costa americana até chegar a Alaska, moito antes de que o fixera o famoso explorador británico James Cook. O seu obxectivo era atopar o Paso do Noroeste, a vía para chegar a Europa desde o Pacífico sen ter que rodear o Cabo de Hornos, pero a medida que se achegan a Siberia, a Favorita tivo que poñerse a abrigo polas fortes treboadas do Mar de Bering.

Libro coa sinatura de Francisco Mourelle de la Rúa / Galipedia

Mourelle decidiu deixar constancia desa expedición nun diario que acabaría, anos despois e traducido ao inglés, en mans de Cook, que o utilizou para surcar esa parte da costa americana na súa terceira viaxe polo Pacífico.

Outras fazañas

Pero a historia deste intrépido mariño coruñés non rematou aquí. Destinado nas Filipinas conseguiu abrir unha nova ruta entre esta illa e a costa mexicana e, xa con 49 anos, en 1799, en momentos turbulentos para a coroa española conseguiu, en Alxeciras, nun hábil golpe militar capturar centos de prisioneiros e unha fragata, unha cañoneira e varios buques de transporte británicos.

Toda a súa historia podedes consultala nesta entrada da Galipedia ou nesta reportaxe de El Mundo. Pero para afondar máis na súa vida, aquí tedes unha completa investigación de Xosé A. Fraga.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Informe de erros

O seguinte texto será enviado aos nosos editores: