Cen anos do compostelán Salón Teatro, unha das grandes sedes da cultura na cidade | Historia de Galicia
Salón teatro dende a Rúa Nova / foto Miguel T CCBy Google

Cen anos do compostelán Salón Teatro, unha das grandes sedes da cultura na cidade

Tempo de lectura: 2 min.

Cen anos de teatro e cine no corazón cultural da zona vella, interrompidos só en dúas décadas. Este e o legado que o vindeiro día 30 de outubro nos deixará o histórico Salón Teatro da cidade de Santiago de Compostela.

E é que o histórico teatro foi levantado en 1920 polo daquela arquitecto municipal Jesús López de Rego, un dos introdutores do modernismo na cidade e autor de obras como a inca do Espiño en Galeras. A súa primeira construción foi promovida en 1919 pola Liga Mutua de Señoras de Santiago.

De teatro da Liga a cine da Empresa Fraga

Salón Teatro en 1930 / foto www.prospectoscine.com

Na súa orixe estaría ideado como unha sala de eventos e espectáculos para as socias da Liga. Tería un aforo para máis de 500 persoas en forma de anfiteatro, patio de butacas, un andar primeiro con palcos e un escenario, iso si non moi grande.

Tras a Guerra Civil o local foi vendida a Acción Católica, pasando anos despois a mans da Empresa Fraga, converténdose en cine. Foi naquela época, en 1949, cando se reforma a fachada, tal e como hoxe se conserva deseñada polo histórico arquitecto Pons Sorolla y Arnau, cunha orde xigante de pilastras, e un singular balcón.

Sede do Centro Dramático Galego

Coa chegada das salas de multicine na década de 1970 o inmoble quedou en desuso ata que foi mercado pola Xunta de Galicia en 1996. Tres ano máis tarde foi reformado baixo o proxecto dos arquitectos Baltar, Bartolomé e Almuíña, perdéndose daquela, iso si, todo o seu antigo interior.

Interior do Saón Teatro / foto CDG

Dende aquela depende da Xunta sendo sede do Centro Dramático Galego (CDG). Foi inaugurado en outubro de 1999 coa obra Se o vello Sinbad volvese ás illas… de Álvaro Cunqueiro. Dende aquela ademais das estreas do CDG acolle diversos festivais de cine, música e teatro da cidade.

Teatro e música dende os seus balcóns para celebrar os seus cen anos

Momento da obra Divinas Palabras Revolution do Centro Dramático Galego / Foto HdG

Para celebrar o seu centenario o Centro Dramático Galego (CDG) retomará a súa actividade tras o parón da Covid-19. Farao co programa musical Mércores de varanda, que ofrecerá, ademais de teatro, oito concertos de artistas e grupos galegos que comezarán cun cun pequeno petisco musical de cada un dende o balcón do Salón Teatro.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar. Non esquezas deixar o teu email se queres que o autor/a che dea unha resposta

Escrito por

Historiador da Arte pola Universidade de Santiago de Compostela, Máster en Renovación Urbana y Rehabilitación e Diploma de Estudos Avanzados en Arte, Urbanismo e Patrimonio. Especialista en fotografía esférica. Especialista en arquitectura e territorio. Xestor de Contidos en Historia de Galicia. www.inigomouzoriobo.eu

Pode que che interese...

Informe de erros

O seguinte texto será enviado aos nosos editores: