Coñece o documental que conta a historia da moura que levanta os dolmens
Unha moura que constrúe os dolmens, que está detrás do arco da vella, que transporta os grandes penedos ou que está detrás de lendas como a nacemento do Miño. Tamén da que en Historia de Galicia falamos en moitas ocasións na súa faceta de deidade ou de vella. Agora a moura galega será protagonista dun novo documental.
Trátase de O país da Moura, un proxecto do antropólogo Rafael Quintía, con Valentín García Bóveda como produtor e con Miguel Alonso como responsable da realización técnica. O proxecto está desenvolvido pola empresa Ab Origine.
E é que, con case dúas horas e media de metraxe e dividida en once capítulos, este traballo antropolóxico conta a historia da principal personaxe da mitoloxía galega. Faino a través dos testemuños de varios expertos, como Antonio Reigosa, Buenaventura Aparicio Casado, Anxo Rosales, o propio Rafael Quintía, ou a nosa colaboradora Lidia Mariño.
Tamén dende a recopilación dos testemuños da veciñanza de máis de 30 concellos das catro provincias. O documental recolle a investigación do propio Quintía titulada Análise estrutural e simbólica do mito da Moura galega, Premio Vicente Risco na súa vixésima edición.
Porén o autor quixo darlle voz e imaxe a xente que mantén viva esta testemuña oral e empregar o soporte audiovisual como ferramenta para complementar o traballo. Non en balde trátase de contar o que seguramente é o mito máis importante do noso folclore.