Na procura do último son da morte en Galicia
A Galicia rural non se pode entender sen as súas campás. Forman parte do patrimonio material coma obxecto físico e do inmaterial e, precisamente, para tentar conservar este ben de interese incalculable e que vai morrendo de vagar, ao mesmo tempo que morre esa Galicia rural, o músico e representante da Asociación Campás e Camiños, Xesús Álvarez, acaba de sacar un interesante proxecto; o proxecto Badaladas.
Badaladas.gal é unha web que contén un inventario das campás do camiño de Santiago en Galicia, tanto do camiño Francés dende O Cebreiro como do Primitivo dende Fonfría, na Fonsagrada. Nel aparecen inventariadas 187 campás en 80 igrexas, capelas, catedrais e mesmamente algunha Casa do Concello localizadas nos camiños Francés e Primitivo. Xa que o acceso ás campás non é doado, esta páxina pretende achegar o coñecemento das campás ao público e mesmamente tocalas e escoitar o seu son sen subir ao campanario.
“A idea de badaladas.gal sae dunha mestura de circunstancias. Tocar as campás na procesión da festa en Sistallo, onde nacín. Ese contacto coas campás espertou o meu interese por elas. Tamén ser músico, pensar que se pode facer música coas campás e ter traballado en Enxeñería Planta Exterior saíndo pola provincia e agora poder revivir un traballo de campo. En suma facer este traballo foi lembrar vivencias”, apunta Xesús.
Outras páxinas presentan toques que se recolleron a campaneiros, como o toque “a dobrado”, toque “a largo” e toque “a releixar” – a defunto – así como a antigüidade e as inscricións que se ven nas campás. A máis antiga inventariada neste traballo é a campá pequena da capela de Santa María da catedral de Santiago, do ano 1380. A máis recente, a grande da igrexa de Liñares, do ano 2008. Toda a información en Lugo Xornal.