1,5 millóns para poñer en valor un dos monumentos máis esquecidos de Galicia; o Parque do Pasatempos de Betanzos
O delegado do Goberno en Galicia, José Miñones, anunciou que o Executivo posibilitará a rehabilitación integral do Parque do Pasatempo de Betanzos ao autorizar un investimento de 1,5 millóns de euros. Un investimento que forma parte do Plan Nacional Turístico Xacobeo, en concreto, das partidas dedicadas á restauración patrimonial de bens de interese cultural para uso turístico nos camiños de Santiago.
A promotora da actuación será a Xunta de Galicia, quen deberá dar conta dos seus traballos ao Ministerio de Industria, Comercio e Turismo para liberar os investimentos. En todo caso, deberán estar terminados antes de 2025.
O delegado do Goberno comprobou varias das zonas nas que se prevé actuar e que actualmente rexistran diversos problemas de degradación e humidades e destacou que este diñeiro permitirá “volver gozar desta contorna única dunha maneira segura e máis sustentable medioambientalmente”.
