O empresario filántropo que acabou esquecido pola súa militancia galeguista

Houbo un tempo no que o Balneario de Mondariz era símbolo de progreso, de modernidade e, sobre todo, dun novo modelo de empresa que encarnaba un dos grandes empresarios galegos do século XX; Enrique Peinador Lines.Non foi un empresario ao uso, meteuse en accións e proxectos nas que, daquela, moi poucos empresarios confiaban. Pero a Peinador todo lle foi saíndo, ata o crack do 29 no que comezaron os seus problemas. Uns problemas que se agravarían no 36 e coa vitoria franquista. E é que os nacionalcatólicos nunca lle perdoaron a súa militancia no Partido Galeguista.

Peinador difundiu parte da nosa historia e dos seus protagonistas a través de excelentes publicacións: La Temporada (1889-1931), que se entregaba gratuitamente aos bañistas, de carácter semanal; Mondariz (1915-1922), revista literaria e histórica de amplo espectro, coa colaboración de plumas recoñecidas, coordinada nun principio polo xornalista galego Alfredo Vicenti; e con libros que saían da imprenta do propio balneario dos máis prestixiados escritores galegos entre os que sobresae Ramón Cabanillas. Para este labor contou cos debuxantes e pintores máis recoñecidos da nosa cultura como Sotomayor, Cebreiro, Castelao, Bello Piñeiro…

Escultura de Enrique Peinador no Balneario de Mondariz / mundiario.com

Mecenas de investigacións arqueolóxicas

Tamén realizou actos culturais de relevancia no seu recinto hidrotermal, desde sesións da RAG, da que era membro correspondente, ata homenaxes a persoeiros da cultura galega como Murguía, pasando por exposicións pictóricas, concertos de música, rescate de festas e tradicións populares, realización de folións e conmemoracións de variada índole relacionadas coa comarca e co país.

E puxo en valor as investigacións arqueolóxicas da zona, coa colaboración do seu xenro Isidro Parga Pondal co profesor e colega Luís Pericot, máis co SEG e Cuevillas á cabeza, e o arqueólogo Ángel del Castillo. Xunto a seu pai, puxeron en marcha un Museo arqueolóxico e etnografico no recinto mondarizano, un dos primeiros de Galicia de carácter privado. Tamén fixeron importantes doazóns de pezas ao Museo de Pontevedra.

“Enrique Peinador Lines e Mondariz, empresa, turismo e país” é un libro de Ricardo Gurriarán no que se pescuda toda a actividad empresarial filantrópica, cultura, empresarial e política de Peinador. Galicia Confidencial falou co autor sobre esta figura. Podedes ler a entrevista no GC.