Os xeólogos queren un Parque Natural no Monte Pindo
O Ilustre Colegio Oficial de Geólogos (ICOG), organización profesional dos xeólogos de todo o estado acaba de adherirse á iniciativa para declarar o Monte Pindo como Parque Natural.
“Isto supón un impulso definitivo a esta reivindicación social que cada día subscita un apoio social e académico máis unánime, mesmo alén do territorio galego. Non é a primeira vez que contamos coa adhesion dun Colexio Oficial, pero si o primeiro que o fai que opera a nivel estatal”, suliña a entidade Monte Pindo Parque Natural.
Monte Pindo / galiceando.com
As formacións xeolóxicas do Monte Pindo son, desde hai tempo, motivo de estudo. De feito, xa se dedicou o recente Geolodía 2016, protagonizou unha Tese doutoral e mesmo a NASA fixouse na curiosa microbioloxía das grotas graníticas para avanzar na busca de vida alén do noso planeta. “Este incipiente interese débese en gran parte grazas ao esforzo investigador e divulgador do Instituto Universitario de Xeoloxía Parga Pondal, dependente da UDC, e en especial á constancia do seu director, o profesor Juan Ramón Vidal Romaní, gran colaborador e directivo da nosa entidade”, sinala a entidade.
O Monte Pindo tamén está proposto para os primeiros Xeoparques da Península Ibérica, unha figura de recoñecemento internacional dependente da UNESCO.
Tamén entrou en funcionamento unha nova casa de turismo rural, Cucurujú Aloxamento, que colle prestado o curioso e distintivo nome do lugar onde está ubicado. Trátase dunha fermosa casiña de pedra tradicional situada en plena ladeira do Monte Pindo, rehabilitada con moito gusto por Sabela Romar.
