Domingo Fontán, o pai da xeografía galega, homenaxeado polo PPdeG
Foi o impulsor da xeografía moderna en Galicia e o primeiro en elaborar un completo mapa do país, a súa Carta Xeométrica de Galicia. Domingo Fontán, matemático, xeógrafo e político, recibiu este sábado unha homenaxe do PPdeG.
O acto de homenaxe tivo lugar na Praza de Praterías de Santiago, aos pés da Torre da Berenguela da Catedral, que serviu de “vértice” para o estudo cartográfico de Fontán, nacido no concello de Portas (Pontevedra) en 1788.
O alcalde deste municipio, Victor Estévez, participou no acto xunto ao tamén xeógrafo e actual conselleiro de Cultura, Educación e Ordenación Universitaria, Román Rodríguez, ambos os dous membros da comisión de cultura do PPdeG.
A Carta Xeométrica de Galicia
En 2017 cúmprense 200 anos desde que Domingo Fontán iniciara os traballos de elaboración da Carta Xeométrica de Galicia, que finalizaría 17 anos despois e que está considerada como o primeiro mapa topográfico e científico de España.
Román Rodríguez enxalzou “os valores cívicos, de progreso e solidariedade” de Fontán, a persoa “que lle puxo rostro” a Galicia. Ademais, o titular de Cultura da Xunta reivindicou a figura “política” de Domingo Fontán, que foi “atacado” por parte “dos totalitarismos e populismos da época” polas súas “ideas” baseadas en “crer na liberdade do individuo”.
Desde hai uns días, os afeccionados á cartografía xa poden gozar, no visor de mapas do Instituto de Estudos do Territorio da Xunta de Galicia, do visionado da Carta Xeométrica de Galicia de Fontán.
