A estatua de Franco a Cabalo no centro de Ferrol visionesdeferrolterra.blogspot.com

O memorial dos mil represaliados do Franquismo en Ferrol vai tomando forma

Tempo de lectura: 2 min.

“En xullo do 1936 importantes seccións do Exército español erguéronse en armas contra da legalidade republicana, desencadeando unha fatal guerra de tres anos”. A represión foi brutal e “foi o medio principal para acadar un Nuevo Estado asentado de maneira permanente nunha represión metódica e implacable, un réxime que nunca se someteu a ningún control democrático. Aquel tempo cruel durou ata 1976″, como afirman dende o Concello, catro décadas completas.

É por isto que o Pleno municipal de Ferrol aprobou o 29 de setembro do 2017, sen ningún voto en contra, e tan so coa abstención do Partido Popular, a construción dun memorial que recolla a lista de vítimas do Franquismo nas comarcas de Eume Ferrolterra e Ortegal. O memorial estará localizado ó pé das tapias do cemiterio de Canido, onde Xaime Quintanilla, alcalde republicano de Ferrol, foi fusilado o 18 de agosto de 1936 e tomará como centro de referencia Ferrol como lugar onde a represión mortal foi cuantitativamente máis elevada.

Artilleiros franquistas agardando para ocupar Ferrol o 20 de xullo de 1936

A nómina de vítimas foi elaborada polos Doutores en Historia Bernardo Máiz Vázquez e Xosé Manuel Suárez dous dos maiores especialistas do período, e que identificaron ata o mes de xullo un total de 984 represaliados nas tres comarcas. Para isto os profesores Máiz e Suárez, tiveron que facer un inxente estudo e análise dos sumarios dos consellos de guerra que produciu a represión así como a investigación en rexistros civís e parroquiais. O resultado foi unha moi fiable e completa base de datos de persoas represaliadas con nomes, datas, lugares. O proxecto estará financiado pola Mancomunidade, á Deputación e os 21 concellos da área estudada.

“Podemos adiantar que de Ortegal ó Eume o número de vítimas de fusilamentos e de paseos entre 1936 e 1939 supera con moito ás oitocentas. Tristemente, a represión continuou durante toda a Ditadura e aínda sobrepasou á morte do ditador, de xeito que a cifra total de persoas asasinadas ata 1976 achegase ás mil”, sinálase dende o Concello. Con este “memorial, renderemos homenaxe perdurable ás mulleres e homes que entre 1936 e 1976 deron a súa vida na defensa da democracia e a igualdade”.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Deixa unha resposta

Informe de erros

O seguinte texto será enviado aos nosos editores: