A Xunta aproba o parque eólico que afecta patrimonio arqueolóxico e paisaxístico na serra do Gontón
A Dirección Xeral de Calidade Ambiental da Xunta publicou o pasado martes a Declaración de Impacto Ambiental do proxecto eólico Mouriños, impulsado por Fenosa Wind (Agora Naturgy). Pero, a pesar dos reparos iniciais dos distintos departamentos da Xunta de Galicia, o proxecto eólico salvou os obstáculos de afección ao patrimonio cultural, arqueolóxico e paisaxístico.
O novo parque prosperará no Alto da Fernandiña, na serra do Gontón, aínda que tan só con 3 eólicos, e non os 4 inicialmente previstos. O concello de Cabana, que apoia o parque, remitiu varios informes favorables. No primeiro, conluía que o estudo ambiental redactado pola empresa promotora “… ofrece a información suficiente (inventario ambiental, identificación e valoración de impactos, estudo de ruídos, sinerxías, de avifauna e quirópteros, de elementos arqueolóxicos, etcétera) para garantir que as obras analizadas non supoñan un impacto ambiental inaceptable”.
Posteriormente, volveu contratar un segundo informe á mesma empresa no que “…volve a manifestar a súa conformidade coa addenda do EsIA xa que contempla a problemática específica na zona de actuación e aporta a información suficiente para garantir que as obras non supoñan un impacto ambiental inaceptable”.
“A falla de obxectidade dos informes aportados polo concello cabanés, xa que a empresa redactora ten intereses na xestión da auga municipal e outros contratos dos que resultou beneficiaria, foi decisiva para a aprobación do documento ambiental”, denuncia Petón do Lobo.
Castelo de Borneiro / GC
Críticas
Nos últimos meses, varias entidades ecoloxistas e veciñais, tal e como recolleu hdg, denunciaron o impacto que este proxecto eólico tería sobre o patrimonio cultural. Así, apuntaban que afectaría a un castelo e a unha mámoa.
O castelo de Borneiro, na parroquia de San Xoán de Borneiro en Cabana de Bergantiños é un ben catalogado da Idade do Ferro e con continudiade na Época Altomedieval. Presenta unha característica que é difícil ver noutros castros da contorna como é a existencia de tres antecastros vinculados ao recinto principal.
Salvemos Cabana tamén denunciou que o parque éolico tamén afectará á mámoa do Pico de sinde, que tamén aparece catalogada. Trátase dun túmulo megalítico do Neolítico cun grao de protección II –xacementos arqueolóxico que non están declarados Ben de Interese Cultural–.
