Novidades sobre o vehículo que “asaltou” o illote do Areoso: era un quad anfibio

A comezos desta semana, HdG daba conta dunha situación insólita no illote do Areoso, un dos grandes espazos patrimoniais da Illa de Arousa, e que conserva numerosos restos de túmulos funerarios. Tratábase do que parecía ser un quad circulando polos seus areais.

Tras a publicación da nova, un lector aportou unha nova imaxe na que se poden ver dous quads, vehículos motorizados de catro rodas, pero, coa particularidade de que son anfibios. É dicir, son vehículos que poden andar por terra e por auga.

De feito, na foto publicada nas redes sociais do HdG vese que un deses vehículos é vermello, como o que “asaltou” o Areoso hai uns días. Este medio non puido confirmar se se trata do mesmo quad e do mesmo conductor. Con todo, as fontes consultadas apuntan que non son moitos os quads matriculados que sexan anfibios na comarca polo que as autoridades poderían dar co seu propietario.