Feijóo destina 3,5 millóns ao Camiño en Betanzos e pide diñeiro ao Goberno central para o Parque do Pasatempo
O presidente do Goberno galego, Alberto Núñez Feijóo, destacou hoxe o compromiso da Xunta con Betanzos e a súa historia, no obxectivo da posta en valor do Parque do Pasatempo, pero sobre todo, do Camiño de Santiago.
Durante o acto de conmemoración do 800 aniversario da cidade, Feijóo reiterou o compromiso de que o centro histórico de Betanzos sexa a mellor cara de presentación para os veciños e para os visitantes, “e, por iso temos que traballar todos xuntos para achegar entre todas as administracións os fondos necesarios que permitan poñer en valor o único parque deseñado con fins didácticos en España”, sinalou, incidindo na necesidade de que o Goberno central se implique economicamente con este proxecto, ao tempo que recordou que a Xunta xa ten iniciado o proceso para a declaración de BIC.
O chamamento de Feijóo chega tras anos de desleixo por parte das institucións, incluída a Xunta, que leva anos de atraso na declaración de BIC deste monumento.De feito, a Xunta non recolle ningunha axuda concreta para axudar á posta en valor do Parque do Pasatempo, mentres destinará 3,7 millóns de euros ás parroquias de Requián e Tiobre para poñer en valor o Camiño de Santiago.
En relación ás actuacións no núcleo histórico, e logo de recordar a posta en marcha en 2012 do albergue de peregrinos tras a rehabilitación da Casa da Pesqueira, o presidente do executivo autonómico salientou o obxectivo de levar a cabo a rehabilitación de inmobles para 16 vivendas de uso público, ademais da terceira fase do conxunto histórico, no que a Xunta e o Goberno central xa abonaron 700.000 euros.
Os 800 anos de Betanzos
No acto de conmemoración, Feijóo asegurou que os oitos séculos da cidade representan para o Goberno galego unha responsabilidade, un estímulo e un acicate. E resaltou a historia de Betanzos como a proba de que a historia é para os galegos sinónimo de continuidade e unión: “Os pasos dados polos galegos, españois e europeos están aquí representados. A evolución, o progreso, a viaxe incesante polas idades da historia ata chegar a estas alturas do século XXI, están presentes e vivos na vila dos cabaleiros”, abundou, facendo fincapé en que cada veciño se sente depositario dos 800 anos “que celebramos e que celebra toda Galicia”.
Nesta mesma liña, sinalou que esa apertura ao exterior que caracteriza á Comunidade, tivo en Betanzos, no seu porto, un dos seus fitos co tráfico de mercadorías e a chegada de romeiros camiño de Santiago. “A historia de Galicia atópase resumida na vosa historia, na historia dos betanceiros”, concluíu.
