Petróglifo danando por unha queima da Xunta en Ourol / Mariña Patrimonio

A Xunta dana un petróglifo catalogado tras realizar unha queima “controlada” no Xistral

ADEGA e Mariña Patrimonio veñen de denunciar perante o Servizo de Protección da Natureza , SEPRONA, posibles danos nun petróglifo situado no Xistral, concretamente no Chao de Sinás (Ourol-Lugo).

Segundo denuncian ambas as dúas asociacións, os danos foron ocasionados pola propia Xunta, ao realizar a comezos de ano unha queima controlada do mato que cubría unha zona arqueolóxica, catalogada e protexida pola Xunta de Galicia. Ao parecer, este lume tería afectado especialmente o petróglifo 13 (GA27038036).

Zona de petróglifos queimadas en Ourol coa participación da propia Xunta na queima autorizada / Mariña Patrimonio

Nesta zona arqueolóxica do Chao do Sinás, onde a Xunta de Galicia ten catalogadas trece laxes con petróglifos e dúas mámoas (das cales unha alberga o coñecido dólmen da Arca de Sinás), a queima así como o paso dun tractor con desbrozadora de cadeas para controlar o lume non contaban coa preceptiva autorización da Consellería de Cultura, segundo souberon ADEGA e Mariña Patrimonio.

Estas asociacións consideran especialmente grave que sexa a propia administración quen dane o patrimonio cultural. Ademais, sosteñen que esta queima sobre un petróglifo, e nunha zona arqueolóxica protexida, é unha nova mostra do “desleixo e da incompetencia” da Xunta de Galicia.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Deixa unha resposta

Informe de erros

O seguinte texto será enviado aos nosos editores: