Atopada unha pequena cidade romana soterrada na Ribeira Sacra
Un gran edificio con construcións asociadas duns 3.000 m2, con evidencias de baños no seu interior. Ao seu carón outros de menor tamaño asociados a rúas ou calzadas de paso. Isto é o que se ten atopado baixo a parroquia de Proendos, en Sober, ao carón da Ribeira Sacra.
Uns achados que levan a pensar a Estela Arqueoloxía e Patrimonio que se trata dun complexo entramado urbano, unha pequena cidade ou vila de época antiga que podería ter a súa orixe na época romana polos numerosos obxectos asociados a esta época atopados en toda a contorna.
De feito, no lugar existía a constancia da presenza dun xacemento arqueolóxico de gran tamaño do cal se teñen documentado numerosas pezas: columnas, cerámicas e material construtivo. En outubro de 2019 esta empresa realizou unha prospección con xeoradar en terreos nas proximidades da igrexa e os resultados non deixan lugar a dúbidas.
Prospección con xeoradar en Proendos (Sober), onde se atopou unha pequena cidade romana / Concello de Sober
Outros puntos prospectados ofrecen información sobre posibles estruturas de almacenamento, captación de auga e incluso existe unha posible estrutura defensiva a modo de foxo, así como a coñecida necrópole de Proendos.
As características urbanas constatadas fan pensar en grandes edificios de cronoloxía romana xunto con fases prehistóricas e medievais. A funcionalidade e identificación dos edificios non se poderán determinar ata unha futura realización de escavacións arqueolóxicas que contrasten os datos. Máis información en Xornal de Lemos.
