Outra vez unha plantación de eucaliptos dana restos arqueolóxicos dun castro
Galicia, o seu patrimonio e os eucaliptos están, por desgraza, dende hai tempo, relacionados As consecuencias da plantación irregular e desproporcionada de eucaliptos no país están a facer danos profundos no noso patrimonio. Este é o caso do Castro do Bargo na parroquia da Peregrina que pertence ao Concello de Santiago de Compostela.
O Castro do Bargo é datado na Idade de Ferro e o recinto está rodeado por unha liña de defensa nun terraplén e un foxo. Ambas estruturas atópanse moi deterioradas polas actividades agropecuarias que se realizaron sobre elas durante anos posteriores.
Mais, a pesar do paso do tempo, como indica en Facebook o colaborador de Historia de Galicia, Xosé Troiano, “pódese apreciar a ollo a típica cerámica alaranxada de tégula, e algún anaco de cerámica nos surcos que se fixeron para plantar eucaliptos“.
O Outeiro do Bargo, onde se atopa o Castro homónimo / Troiano Naino
Este xacemento que se conserva en malas condicións e sen estudar non recibe protección de ningunha administración pública. O único elemento que conserva ben do recinto do Castro do Bargo é unha calzada de pedra “impresionante” que bordea este elemento patrimonial que se atopa nos arredores de Santiago de Compostela, unha das zonas máis esquecidas a nivel arqueolóxico.
