Queres coñecer de preto os tímpanos de Compostela?

Este sábado 23 de abril a Agrupación Cultural O Galo organiza unha visita aos tímpanos que se poden ver na cidade de Santiago de Compostela. A visita, que é de balde, estará guiada polo doutro en Historia da Arte pola USC David Chao Castro, quen explicará as peculiaridades deste elemento arquitectónico ao tempo que se percorre a cidade.

Decorados con iconografías en relevo, moitas veces policromadas, os tímpanos ofreceron durante séculos imaxes sagradas aos fieis antes de entrar nos recintos eclesiásticos.

Con esta visita guiada, non só se recorrerá Compostela, se non que se viaxará a través do tempo. A igrexa de Salomé, na rúa Nova, a igrexa de San Fiz de Solovio ou o cemiterio de San Domingos son algunhas das paradas que permitirán coñecer diferentes estilos e temáticas destas pezas arquitectónicas. Finalmente o percorrido rematará nos tímpanos de Praterías, que destacan por representar a Encarnación, a Paixón e as Tentacións de Cristo. A visita celebrarase o sábado 23 e sairá da igrexa de Salomé ás 12.00h.