A USC ofrece visitas guiadas ao seu patrimonio histórico. Estas son algunas das propostas
A USC ofrece visitas guiadas durante este ano 2025 ao seu patrimonio histórico. O patrimonio universitario compostelán é unha parte importante do casco histórico da cidade, que é recoñecido no seu conxunto como Patrimonio da Humanidade pola UNESCO.
As visitas céntranse en tres percorridos que percorren o Colexio de Fonseca, o Colexio de San Xerome e a Facultade de Xeografía e Historia, tres espazos que representan diferentes épocas e usos da USC ao longo dos séculos.
O Pazo de Fonseca: o berce da Universidade
Os seus horarios de visita son os luns, martes, mércores e venres de 11:30 a 12:30 cun prezo de 3 euros.
Fundado no século XVI polo arcebispo Alonso III de Fonseca, este edificio marcou o inicio da actividade universitaria en Compostela. O colexio, organizado ao redor dun claustro, albergaba tanto aulas como residencias. Actualmente, destaca polo Salón Nobre, onde se celebran actos solemnes, e a Biblioteca América, un legado de Gumersindo Busto que recolle fondos hispanoamericanos. Ademais, conserva o facsímil do Libro de Horas de Fernando I de León, unha copia dun dos manuscritos máis antigos da cidade. Outro punto de interese é o Salón do Artesoado, unha antiga aula xeral cun teito mudéxar único en Galicia.
Fachada do Colexio de Fonseca / USC
O Colexio de San Xerome: unha fiestra á praza do Obradoiro
Os seus horarios de visita son os luns, mércores e venres ás 17:00 cun prezo de 5 euros. A reserva desta guía inclúe tamén a visita ao Pazo de Fonseca.
Situado no lado sur da Praza do Obradoiro, o Colexio de San Xerome, do século XVII, foi inicialmente concibido para estudantes con menos recursos. A súa entrada conserva elementos románico-góticos, incluíndo unha representación da Virxe co Neno. No interior, destacan o Paseo de Vítores, cos nomes de antigos estudantes doutores, e o Salón de Graos, antiga capela que hoxe alberga a Maza da Universidade, utilizada nos actos máis solemnes.
Arco da entrada do Colexio de San Xerome / USC
Facultade de Xeografía e Historia: a Universidade da Ilustración
Os seus horarios de visita son os martes e xoves ás 17:00 ou os xoves e sábados ás 12:00 por un prezo de 6 euros.
Edificada no século XVIII no antigo solar dun colexio da Compañía de Xesús, esta facultade simboliza o cambio cara ás ciencias experimentais e o pensamento ilustrado. O seu espazo máis destacado é o Paraninfo, inaugurado en 1906, decorado con frescos que representan as artes, as ciencias e as letras. Tamén é salientable a súa biblioteca histórica, cuxa estética barroca lembra as antigas bibliotecas monásticas.
Paraninfo da Universidade, situado na Facultade de Xeografía e Historia / USC
