O Museo de Pontevedra organiza actividades para divulgar a cultura mariñeira
O Museo de Pontevedra acollerá este venres, día 10, dúas actividades centradas na divulgación da cultura mariñeira galega, coincidindo coa súa actual proposta expositiva, que inclúe as mostras ‘José Benito Otero Baena. Un pintor sen pinceis‘ e ‘Infiltracións. Alberto Baraya. Vento‘.
Segundo informou a Deputación de Pontevedra, a programación inclúe unha charla sobre os aparellos de pesca e un taller práctico sobre o oficio das rederas e o proceso de atado de redes, coa finalidade de dar a coñecer aspectos fundamentais da tradición pesqueira en Galicia.
Ás 17:00 horas, o patrón maior da Confraría de Pescadores de Bueu, José Manuel Rosas Otero, ofrecerá unha charla titulada ‘A mensaxe dous aparellos de pesca’. Neste encontro, de acceso libre, abordará a evolución histórica das artes de pesca desde unha perspectiva galega, conectando esta tradición co contido da exposición dedicada a Otero Baena.
Horarios e inscricións
Posteriormente, ás 18:00 horas, terá lugar unha charla-taller dirixida por Amalia Puga e membros da Asociación de Redeiras Atalaia da Guarda. Esta actividade, orientada a maiores de 16 anos e con inscrición previa a través do correo reservas.museo@depo.gal, permitirá aos asistentes coñecer as técnicas e ferramentas empregadas no atado de redes, ademais de confeccionar unha peza inspirada nas bandexas Patela, empregando un kit facilitado pola organización.
As dúas propostas buscan destacar a importancia do patrimonio mariñeiro na configuración da identidade cultural galega, integrando coñecementos tradicionais no marco das iniciativas do museo.
