Comezan as escavacións do xacemento recentemente atopado no barrio do Castrillón na Coruña
Esta mañá deron comezo as prospeccións arqueolóxicas no xacemento de Castrillón, situado no barrio coruñés de Oza-Castrillón. Os traballos, que se prolongarán durante dez días, teñen como obxectivo determinar a extensión e o interese dos restos arqueolóxicos atopados nesta zona en 2014. A intervención enmárcase dentro do Plan Urbanístico Especial do Parque de Oza, aínda pendente de aprobación definitiva.
O achado dos restos arqueolóxicos produciuse durante a execución das obras de apertura das rúas Casanova de Eirís e Avenida da Concordia. Naquel momento, identificáronse estruturas que poderían corresponder a vivendas e elementos asociados a un posible asentamento. Estes descubrimentos levaron á súa inclusión no Plan Básico Autonómico da Xunta de Galicia.
Agora, as novas escavacións, dirixidas polo arqueólogo Emilio Ramil González, contan coa autorización da Dirección Xeral de Patrimonio Cultural da Xunta de Galicia e foron encargadas pola Xunta de Compensación Parque de Oza, entidade formada polos propietarios dos terreos, a Fundación Juana de Vega e a Sareb. Segundo explican os promotores do proxecto, a zona afectada contará cunha área verde no novo plan urbanístico.
Preocupación entre a veciñanza e peticións de conservación
Nas últimas semanas, a Xunta de Compensación colocou carteis informativos para avisar do inicio das escavacións e solicitou aos veciños que retiren os peches e plásticos colocados nas parcelas para facilitar os traballos. “O obxectivo era alertar aos particulares que, en precario, viñan usando partes desa leira para sementar, co fin de que puidesen retirarse antes de que dese comezo o operativo de hoxe”, sinalan dende a entidade.
Con todo, varios colectivos veciñais expresaron o seu malestar pola xestión da información. A Asociación de Veciños Castrillón-Urbanización Soto IAR afirma que só foi informada do inicio das obras a través dos carteis colocados na zona. Pola súa banda, a Asociación Oza-Gaiteira-Os Castros lembrou que xa presentou alegacións ao convenio urbanístico, propoñendo a ampliación do Parque de Oza e a recuperación da totalidade do espazo verde previsto no PXOM para a zona M6, garantindo ao mesmo tempo a conservación dos restos arqueolóxicos.
Máis información en Xornal da Coruña
