O Entroido galego acada a distinción de Ben de Interese Cultural
Coa súa publicación no Diario Oficial de Galicia (DOG), o Entroido galego recibe oficialmente o recoñecemento de Ben de Interese Cultural (BIC). Este recoñecemento culmina un proceso iniciado en 2024 e implica a súa máxima protección legal como parte do patrimonio inmaterial de Galicia. Segundo a Consellería de Cultura, Lingua e Xuventude, a decisión responde á “fonda carga histórica, etnográfica e cultural” do Entroido, ademais do seu impacto nas artes e na identidade galega.
A declaración de BIC garante a aplicación do réxime de tutela da Lei de Patrimonio Cultural de Galicia, o que supón a protección e conservación desta festividade. Ademais, este recoñecemento oficial poderá facilitar a concesión de axudas para a súa divulgación e posta en valor.
A iniciativa contou cos informes favorables do Consello da Cultura Galega e do Museo do Pobo Galego, sen que se rexistrasen alegacións en contra. A publicación no DOG pon fin ao proceso administrativo e consolida a consideración do Entroido como unha expresión fundamental da cultura galega.
O Entroido galego destaca pola súa diversidade de celebracións, con manifestacións que van dende os Cigarróns de Verín, os Peliqueiros de Laza ou os Felos de Maceda, ata os Xenerais do Ulla. Moitas destas festas xa contaban con recoñecementos de interese turístico, tanto autonómico como nacional.
Con esta declaración, Galicia suma o Entroido á lista de elementos do seu patrimonio protexido, recoñecendo o seu papel como símbolo de identidade e tradición popular.
