Que vai pasar co lote de moedas únicas do Reino Suevo de Galicia que se van vender en Madrid?

por Redacción · 19 Xuñ, 2025

Tempo de lectura: 2 min.

A Xunta atopou unha solución de urxencia para evitar a poxa de moedas únicas da historia de Galicia. A casa de poxas Jesús Vico tiña previsto realizar o vindeiro 25 de xuño en Madrid unha poxa pública da colección do recoñecido numismático galego Antonio Orol Pernas, que inclúe un dilatado conxunto de moedas acuñadas en Galicia desde a época romana, como diferentes exemplares de series de moedas da caetra, ata un conxunto moi amplo de moedas medievais, da Idade Moderna e ata o século XIX.

Deste xeito, están moedas acuñadas na ceca compostelá, na coruñesa, na luguesa e no caso das moedas suevas e visigodas, en diferentes cidades ou comarcas do noroeste. Entre os prezos de partida das moedas, atópase un exemplar único dun excelente de ouro dos Reis Católicos, cun valor de saída de 25.000 euros, ou a moeda coa inscrición Munita Gallica Pax, tamén considerada única, e que pode estar vinculada aos acordos de paz entre o rei Miro de Galicia e os merovinxios contra os visigodos, ou corresponder á primeira mención numismática a Galicia. O prezo de saída da moeda Munita Gallica Pax é de 15.000 euros.

Tras a polémica destada por esta poxa, a Xunta de Galicia incoará como Ben de Interese Cultural de sete moedas deste lote que se pretende subastar polo seu “excepcional valor”. Consecuentemente, expoñen, a Consellería de Cultura, Lingua e Xuventude publicará nos próximos días no Diario Oficial de Galicia o inicio deste procedemento, que supón “a inmediata salvagarda e protección deste patrimonio”.

Protección

Ademais, vaise a solicitar ao Goberno central que as declare “inexportables” tendo en conta a súa relevancia para o patrimonio cultural de Galicia. Á hora de proceder a incoar este expediente, os técnicos da Dirección Xeral de Patrimonio Cultural valoraron as pezas que forman parte da colección numimástica privada do galego Antonio Orol e atoparon cinco exemplares únicos, que supoñen unha testemuña material e documental da presenza do Reino suevo en Galicia, así como do medievo renacentista.

Consecuentemente, a avaliación dos técnicos determina que teñen a categoría tanto para a historia da Península, como para a Comunidade en particular, de obxecto moble singular. Deste xeito, a declaración de Ben de Interese Cultural suporalles a protección patrimonial esixida polos seus valores históricos, artísticos, culturais e tamén identitarios e territoriais, “xa que plasman con singular relevancia o seu vinculado coa Gallaecia histórica e a existencia do Reino Suevo dentro do período alto medieval”.

Debido a relevancia destas moedas para o patrimonio cultural de Galicia, a Xunta vaille a solicitar de maneira inmediata ao Ministerio de Cultura que emita a Orde que as declare inexportables, como medida cautelar previa ata que se incoe o procedemento de declaración de Ben de Interese Cultural. Deste xeito, trátase de evitar a súa posible saída do país e “unha perda artística e documental inestimable”. No momento en que se publique a incoación no Diario Oficial de Galicia, a Administración autonómica disporá dun prazo de 24 meses para completar o expediente.