Sada acolle a estrea do documental ‘Meirás, cambio de relato’, unha reflexión sobre memoria e patrimonio
A Asociación Cultural Irmáns Suárez Picallo organiza este venres 17 de outubro, ás 20:00 horas, a estrea do documental Meirás, cambio de relato no Salón de Plenos do Concello de Sada, nun acto con entrada libre e colaboración do Concello de Sada e da Deputación da Coruña.
A proxección propón unha mirada contemporánea sobre o Pazo de Meirás, abordando o seu papel na memoria colectiva, o seu valor patrimonial e o discurso público que se constrúe arredor deste símbolo histórico. O filme convida a reflexionar sobre o pasado recente e sobre os retos actuais da conservación e interpretación do patrimonio, nun contexto no que Meirás continúa a ser un espazo central do debate social e político galego.
Desde a entidade organizadora salientan que esta primeira proxección pretende abrir un espazo de encontro veciñal e fomentar a participación cidadá a través do linguaxe cinematográfico como ferramenta de diálogo. “Queremos que o público poida achegarse, compartir impresións e contribuír á conversa sobre o noso patrimonio común”, explican desde a A.C. Irmáns Suárez Picallo.
A asociación, que leva o nome dos irmáns Suárez Picallo, figuras destacadas da cultura e do galeguismo, mantén unha traxectoria centrada na promoción de iniciativas culturais e de divulgación histórica vencelladas á comarca sadense. Con ‘Meirás, cambio de relato’, a entidade dá continuidade a esa liña de traballo, abrindo camiño para futuras actividades divulgativas arredor de Meirás e do seu significado na Galicia actual.
