O Museo Quiñones de León reconstrúe a vida aristocrática de Castrelos entre 1896 e 1934
O Concello de Vigo conmemora o centenario da doazón do Pazo Quiñones de León á cidade cunha exposición inédita que mergulla o visitante na etapa final da súa historia como residencia nobiliaria. Baixo o título ‘Os últimos marqueses. Historia do Pazo de Castrelos, 1896–1934’, a mostra pode verse xa entre os muros do histórico edificio, convertidos en escenario dun relato de memoria, arte e transformación social.
A exposición reconstrúe o período coñecido como o dos “últimos marqueses”, unha etapa clave para entender a evolución do pazo e o proceso que culminaría coa súa entrega ao pobo vigués. O percorrido abrangue desde 1875 ata 1934, anos en que a familia Quiñones de León impulsou reformas arquitectónicas, ampliou os xardíns e configurou a estética que hoxe define o conxunto.
O proxecto é froito dun traballo de investigación desenvolvido durante máis dunha década polo Museo Quiñones de León, coa colaboración de especialistas da Universidade de Santiago de Compostela, investigadores do Reino Unido e o actual Marqués de Valadares, descendente directo da familia e autor de varios estudos sobre a súa historia.
Entre as máis de cen pezas expostas figuran obxectos das coleccións municipais, obras adquiridas recentemente en subastas internacionais de Francia e Reino Unido, e tamén cesións temporais de coleccións privadas de España, Irlanda e o propio Reino Unido. Documentos, retratos, mobiliario e pezas decorativas permiten reconstruír o modo de vida dos antigos propietarios e o contexto cultural da época.
O relato expositivo arrinca coa figura de Fernando Quiñones de León, Marqués de Alcedo, e da súa segunda esposa, a pintora Antonia de Bañuelos, responsables das primeiras grandes transformacións do edificio e dos seus xardíns. A continuación, a mostra céntrase no seu fillo, Fernando Quiñones de León, Marqués de Mos e Valadares, e na súa esposa Maryanne Whyte, unha dama británica que achegou ao pazo un marcado espírito cosmopolita e renovador.
Descrito por algúns investigadores como o ‘Downton Abbey vigués’, o Pazo de Castrelos converteuse durante aquel tempo nun referente da vida social e artística da cidade, escenario de encontros, creación e modernidade. Cen anos despois da súa doazón, Vigo recupera agora esa memoria familiar e colectiva, devolvéndoa ao público a través desta mostra que combina divulgación histórica, patrimonio e emoción.
