Unha exposición analiza a relación entre o porto coruñés e o comercio de persoas escravizadas
O Museo Nacional de Ciencia e Tecnoloxía da Coruña (MUNCYT) inaugura o vindeiro 18 de decembro a exposición ‘Puerto Negrero’, unha mostra que analiza o papel do porto coruñés na trata transatlántica de persoas escravizadas e a súa relación co desenvolvemento económico da cidade entre os séculos XVIII e XIX. A exposición poderá visitarse ata mediados do mes de febreiro.
A mostra insírese no proxecto de investigación ‘A Coruña entre Memorias: Historia, Colonialismo e Identidade’, unha iniciativa centrada na revisión crítica do pasado colonial local e da súa integración nas redes do comercio transatlántico. O proxecto busca contribuír a unha reflexión sobre como ese pasado foi incorporado —ou omitido— na construción da memoria colectiva da cidade.
O percorrido expositivo constrúese a partir de documentación histórica, imaxes, materiais de arquivo e diferentes testemuños, que permiten contextualizar a participación do porto da Coruña no chamado comercio triangular, o sistema económico que conectaba Europa, África e América. A exposición sinala que, aínda que o porto coruñés non foi un dos principais centros da trata, si formou parte destas dinámicas comerciais que sustentaron o crecemento económico de numerosas cidades europeas.
Un dos eixes centrais da mostra é a análise da relación entre o progreso urbano, a acumulación de riqueza e as prácticas de explotación e violencia colonial. O contido expositivo pon o foco nas rutas comerciais, nas fortunas vinculadas a este período histórico e nos silencios que marcaron durante décadas a memoria pública sobre estas actividades.
A exposición aborda tamén as ausencias na memoria histórica e como determinados aspectos do pasado colonial quedaron fóra do relato dominante. Neste sentido, propón unha lectura crítica que relaciona ese legado coa configuración actual da cidade, tanto desde o punto de vista económico como social.
O itinerario de ‘Puerto Negrero’ convida así a reflexionar sobre a persistencia deste pasado na arquitectura, na economía e no imaxinario urbano da Coruña, e a establecer vínculos entre os procesos históricos do colonialismo e as desigualdades sociais que seguen tendo impacto no presente.
