A reparación do tramo danado da Muralla de Lugo saca á luz unha antiga escaleira
As obras de reparación do tramo interior da Muralla romana de Lugo, afectado polo derrube rexistrado a comezos deste mes tras un temporal, permitiron localizar unha antiga escaleira no interior da estrutura. O anuncio realizouno este mércores no Parlamento de Galicia o conselleiro de Cultura, Lingua e Xuventude, José López Campos, en resposta a unha pregunta formulada pola deputada do PPdeG e portavoz popular en Lugo, Elena Candia.
Durante a súa intervención, o titular de Cultura referiuse ao derrube como un “triste suceso” e destacou a resposta institucional articulada tras o incidente. Segundo explicou, a actuación foi inmediata e supón un investimento de 150.000 euros, consignados con carácter de urxencia para garantir a reparación do tramo afectado.
No transcurso destes traballos de consolidación e reconstrución do paramento interior apareceu unha escaleira que, segundo indicou o conselleiro, “se supuña que podería aparecer” no marco da intervención. O elemento atópase actualmente en fase de identificación e análise técnica.
López Campos sinalou que a Xunta aproveitará este achado para realizar unha recompilación exhaustiva da documentación dispoñible e dos vestixios que poidan saír á luz durante a obra, co obxectivo de “reconstruír parte desa historia”. A intervención permitirá, segundo trasladou, incorporar nova información sobre a configuración interna da fortificación.
A Muralla de Lugo, declarada Patrimonio da Humanidade, conta cun plan director que rexe as actuacións de conservación e mantemento. O conselleiro lembrou que desde o ano 2000 se levaron a cabo 60 intervencións, cun investimento acumulado de 10 millóns de euros. Estes traballos incluíron medidas de control da fauna e da flora, así como accións de reparación estrutural.
Ademais da actuación urxente actualmente en marcha, o responsable autonómico avanzou a previsión dun novo contrato por importe de un millón de euros para os exercicios 2026 e 2027, destinado a continuar coas tarefas de conservación da infraestrutura.
“Non é unha cuestión que se deixe á improvisación senón que, como dicía vostede, hai un traballo técnico exhaustivo, rigoroso que nos aconsella cal é o camiño que temos que seguir”, afirmou López Campos na súa intervención parlamentaria.
As obras foron adxudicadas de maneira urxente por un importe de 150.000 euros á empresa que xa viña executando actuacións na muralla. Segundo o conselleiro, esta continuidade facilita a coordinación técnica e a aplicación das directrices previstas no plan director.
O achado da escaleira abre agora unha nova fase de análise no marco das obras, mentres continúan os traballos de reparación do tramo danado polo temporal. A Xunta mantén que as actuacións responden a criterios técnicos e que se integran nunha estratexia planificada de conservación dun dos principais símbolos patrimoniais de Galicia.
