A UDC abre ao público un ciclo sobre as orixes da humanidade e de Ferrol no Campus Industrial
A Facultade de Humanidades e Documentación do Campus Industrial de Ferrol abrirá as súas portas este venres 20 ao público xeral para inaugurar unha nova edición do ciclo de conferencias organizado pola Universidade da Coruña en colaboración co Concello de Ferrol, a través da cátedra de Arqueoloxía e Educación Patrimonial. A iniciativa, vinculada ás escavacións no castro de Esmelle, retoma a súa actividade cun programa centrado nas orixes da humanidade, da civilización e do propio territorio ferrolán.
Esta edición volve render homenaxe ao paleontólogo ferrolán Emiliano Aguirre, falecido en 2021, figura de referencia na investigación sobre a evolución humana. A conferencia inaugural, titulada ‘As orixes da humanidade: do berce africano ás terras galegas’, correrá a cargo do investigador Edgard Camarós Pérez, integrante do Grupo de Estudos para a Prehistoria do NO Ibérico. Arqueoloxía, Antigüidade e Territorio da Universidade de Santiago de Compostela. O acto terá lugar ás 19.00 horas no salón de graos do centro, con entrada libre.
O ciclo continuará o venres 27 coa intervención do director da cátedra e profesor no Campus Industrial, Juan Luis Montero Fenollós, quen ofrecerá a ponencia ‘As orixes da civilización: 20 anos de arqueoloxía da UDC no Oriente Próximo’. A súa intervención repasará dúas décadas de traballos arqueolóxicos desenvolvidos pola universidade coruñesa fóra da Península Ibérica.
A terceira e última sesión celebrarase o 6 de marzo e contará coa participación de Samuel Nión Álvarez, investigador do Consejo Superior de Investigaciones Científicas e director técnico das escavacións arqueolóxicas en Esmelle. A súa charla, baixo o título ‘As orixes de Ferrol: escavacións arqueolóxicas en Tralocastro’, centrará o foco nos traballos desenvolvidos neste enclave e na súa relevancia para coñecer o pasado máis antigo do municipio.
As conferencias contan tamén coa colaboración da Fundación L. Monteagudo e do Centro Torrente Ballester, espazo que acolle ata o 26 de abril a exposición ‘Orixes IV. Urbanismo Castrexo’. A mostra constitúe o cuarto capítulo dun proxecto expositivo no que se presentan os resultados da última campaña de escavación realizada en Esmelle entre o 14 de xullo e o 1 de agosto de 2025, coa participación da Xunta de Galicia.
‘Orixes IV. Urbanismo Castrexo’, no Centro Torrente Ballester
