Os novos descubrimentos no Castro da Cividade abren liñas sobre comercio, simboloxía e ocupación romana
As intervencións arqueolóxicas desenvolvidas nas últimas semanas no Castro da Cividade, situado na parroquia de San Xurxo de Sacos, no municipio de Cerdedo-Cotobade, permitiron a aparición dunha moeda romana pendente de datación, a garda dunha espada ou puñal e unha doa de bronce pertencente a un colgante.
Segundo informou o Concello, os primeiros indicios derivados das análises técnicas sinalan que se trata de materiais de relevancia para avanzar na comprensión do pasado do enclave e das comunidades que o habitaron.
Entre os achados máis destacados atópase unha doa de bronce, conservada en bo estado, que formaría parte dun colgante. A súa tipoloxía apunta á presenza de adornos persoais asociados a dimensións simbólicas ou identitarias no contexto castrexo.
No mesmo sector de escavación apareceu a garda dunha arma branca, posiblemente dunha espada ou dun puñal, decorada con motivos circulares. Esta ornamentación presenta semellanzas formais con trazos coñecidos da arte rupestre galega, o que abre hipóteses sobre conexións culturais e simbólicas entre os pobos castrexos e as tradicións gráficas documentadas nos petróglifos da contorna.
Outro dos elementos que centra agora a atención do equipo técnico é unha moeda romana, actualmente en proceso de estudo para determinar a súa cronoloxía exacta e a ceca de acuñamento. A confirmación da súa datación podería achegar información sobre contactos comerciais e sobre unha posible continuidade de ocupación do asentamento durante época romana, ampliando así o marco temporal coñecido ata o momento.
As pezas recuperadas están a ser sometidas a procesos de catalogación e análise estratigráfica, co obxectivo de definir con maior precisión as distintas fases de ocupación do castro e o seu papel dentro da rede de asentamentos do interior da provincia de Pontevedra.
Desde o Concello sinalan que os traballos forman parte dunha estratexia de conservación, recuperación e posta en valor do patrimonio arqueolóxico local, coa previsión de impulsar novas fases de intervención. O alcalde, Jorge Cubela, valorou a aparición destes materiais como unha “confirmación das expectativas” coas que se iniciou a campaña e destacou o “potencial extraordinario” do xacemento.
O rexedor indicou tamén que os descubrimentos “incrementan o valor patrimonial do xacemento e reforzan a identidade colectiva” do municipio, ao tempo que avanzou a intención de continuar promovendo novas intervencións que permitan consolidar o enclave como referencia do patrimonio castrexo da provincia.
O Concello agradeceu a recente visita ao xacemento do conselleiro de Cultura, José López Campos, así como do presidente da Deputación de Pontevedra, Luís Menor, interpretando esta presenza como un respaldo institucional ao proxecto.
As actuacións continuarán nas vindeiras semanas coa análise pormenorizada dos materiais recuperados e coa planificación de futuras campañas arqueolóxicas, orientadas a seguir desvelando a historia soterrada deste enclave e a definir con maior detalle o seu papel nas dinámicas sociais, culturais e comerciais da antigüidade no interior de Pontevedra.
