A memoria da ditadura arxentina chega a Santiago nun novo encontro na Granell
A Fundación Eugenio Granell de Santiago de Compostela acolle unha nova sesión dos Encontros Americanos, centrada nesta ocasión na análise do golpe militar de 1976 en Arxentina cando se cumpren cincuenta anos daquela ruptura histórica. A actividade, titulada ‘Arxentina a 50 anos do Golpe Militar’, contará coa intervención do historiador Nicolás Sillitti, especialista en historia contemporánea americana.
O encontro propón unha reflexión arredor do terror exercido polo Estado durante a ditadura, así como das súas consecuencias ao longo das últimas décadas. A sesión abordará tamén o papel desempeñado polos movementos de dereitos humanos na procura de xustiza e memoria, así como as distintas interpretacións existentes sobre o pasado ditatorial.
Outro dos eixos centrais será a análise da construción do consenso democrático en Arxentina tras o fin da ditadura, así como os desafíos que ese modelo afronta na actualidade. A actividade pretende abrir un espazo de diálogo sobre a relación entre memoria histórica, política e sociedade, situando o caso arxentino nun contexto máis amplo de América Latina.
Nicolás Sillitti, doutor en Historia pola Indiana University, desenvolve a súa investigación en ámbitos como o nacionalismo, a cultura popular, o militarismo e o pacifismo nos séculos XIX e XX. Ao longo da súa traxectoria impartiu docencia en universidades de Arxentina, Estados Unidos e Europa, e na actualidade exerce como profesor de Historia de América na Universidade de Barcelona. Ademais, participa como produtor e guionista no podcast divulgativo Historiar.
Os Encontros Americanos na Granell configúranse como un programa estable de conferencias que busca ofrecer un espazo aberto para o debate e a reflexión sobre cuestións culturais, sociais e políticas vinculadas ao continente americano. A iniciativa está impulsada polo Grupo de Historia de América (HistAmérica) da USC e conta co apoio da Vicerreitoría de Estudantes e Cultura.
