O Consello da Cultura Galega incorpora o legado musical de Javier Méndez Pérez-Fanego ao Arquivo Sonoro de Galicia
O Consello da Cultura Galega recibiu este mércores en Ferrol o fondo musical de Javier Méndez Pérez-Fanego, sacerdote e compositor que desenvolveu un papel destacado na incorporación do galego á liturxia durante a segunda metade do século XX. A cesión foi formalizada no Casino Ferrolano polo sobriño do autor, Pedro Landeira, e pola presidenta do CCG, Rosario Álvarez, quen sinalou que o obxectivo é “facilitar unha memoria viva” arredor desta figura.
O acto contou coa presenza de diferentes representantes do ámbito cultural e relixioso, entre eles o teólogo Benito Méndez, o concelleiro de Cultura de Ferrol, José Antonio Ponte Far, e o director do Departamento de Música do Secretariado da Comisión para a Liturxia da Conferencia Episcopal Española, Óscar Valado. Durante a sesión tamén se leu un texto de Juan José Rodríguez de los Ríos e actuou a Coral Polifónica Ferrolana, vinculada á tradición musical da familia do compositor.
O material cedido pasará a integrarse no Arquivo Sonoro de Galicia, onde será sometido a procesos de conservación e posta a disposición pública. O fondo inclúe decenas de partituras e arredor de 200 bobinas de audio, algunhas delas en estado avanzado de deterioro, que recollen unha parte significativa da produción musical do autor.
Entre as obras conservadas figuran títulos como “Os salmos pra nosa terra” (1971), “A misa do pobo de Deus” (1974) ou o “Réquiem galego” (1982), así como a recompilación “Xurdirá”, que acadou difusión en parroquias e movementos cristiáns galegos. Trátase dun repertorio caracterizado por melodías accesibles e estruturas pensadas para o canto colectivo, orientadas á participación da comunidade nas celebracións relixiosas.
Unha figura clave na renovación litúrxica en Galicia
Nado en Neda en 1937, Javier Méndez Pérez-Fanego desenvolveu a súa traxectoria nun contexto marcado polos cambios impulsados polo Concilio Vaticano II, que favoreceu o uso das linguas vernáculas na liturxia. A súa obra insírese neste proceso, coa elaboración de composicións en galego destinadas ao uso habitual nas parroquias.
Formado no seminario de Mondoñedo e na Universidade Pontificia de Comillas, foi ordenado sacerdote en 1963 e exerceu en diferentes parroquias, principalmente en Ferrol, onde desenvolveu unha actividade centrada na catequese e na música litúrxica. En 1978 ampliou a súa formación en Madrid e colaborou co Secretariado Nacional de Liturgia.
Xa en 1983 regresou a Galicia como mestre de capela da Catedral de Santiago de Compostela, cargo que ocupou durante dez meses e desde o que promoveu iniciativas como a escolanía catedralicia e a composición de pezas para celebracións solemnes. Falecería ese mesmo ano en Santiago.
