O Museo do Pobo Galego acolle unha xornada sobre máscaras para repensar a cultura popular contemporánea
A ala sur do Museo do Pobo Galego acollerá este sábado, 28 de marzo, a xornada ‘Máscaras: creación e diálogo’, unha iniciativa centrada na análise da cultura da máscara como espazo de creación, reflexión e reinterpretación do patrimonio cultural. A actividade desenvolverase ao longo da mañá e combinará intervencións académicas, debate aberto e un recital musical.
O encontro propón unha revisión da cultura popular desde unha perspectiva actual, entendéndoa como un ámbito en constante transformación. Neste marco, a máscara preséntase como un elemento capaz de integrar tradición, modernidade e cultura de masas, ampliando os seus significados e funcións no contexto contemporáneo.
Segundo a organización, no século XXI este tipo de expresións tamén permiten abordar cuestións sociais como o xénero, ao tempo que favorecen novas formas de expresión colectiva máis inclusivas.
A programación comezará ás 11:00 cun bloque de intervencións que reunirá especialistas de distintos ámbitos. Elena Freire Paz e Marta Veiga Izaguirre, da Universidade de Santiago de Compostela, abordarán a relación entre máscaras e xénero, mentres que M.ª Pilar Panero García, da Universidade de Valladolid e vinculada ao proxecto MASKS, analizará a expansión do etnolóxico e a arte vinculada ás máscaras. A sesión concluirá cunha conversa aberta co público asistente.
Ás 13:00 terá lugar o recital ‘De man en man’, a cargo do músico e folclorista zamorano Luis Antonio Pedraza, que ofrecerá un percorrido pola música tradicional a través de instrumentos e melodías transmitidas ao longo do tempo. A proposta busca manter vivo este legado cultural, destacando a súa continuidade e capacidade de adaptación.
Pedraza conta cunha ampla traxectoria no ámbito da música tradicional, con formación en Historia e Ciencias da Música e unha carreira que inclúe a súa participación en proxectos colectivos e colaboracións con artistas como Joaquín Díaz, Luar na Lubre, Kepa Junkera ou Xabier Díaz, ademais de varios traballos discográficos en solitario.
Actividades vinculadas á exposición ‘MASKS’
A xornada insírese na programación paralela da exposición temporal ‘MASKS. Alas y Viento Collection. Nacho Rovira II’, que permanecerá aberta ao público no museo ata o 26 de abril. No marco destas actividades, este venres 27 de marzo ás 16:30 celebrarase unha visita guiada á mostra, para a que é necesario realizar inscrición previa por correo electrónico antes do día 26.
A asistencia á xornada do sábado será libre ata completar a capacidade da sala.
