Arde Lvcvs Cvltvral activa en Lugo unha vintena de actividades para quentar o 25 aniversario da gran festa romana
Lugo comeza xa a conta atrás para unha edición sinalada do Arde Lvcvs, a gran celebración de recreación histórica da cidade, que en 2026 cumprirá vinte e cinco anos, cun programa cultural paralelo que este ano se desenvolve como antesala da efeméride e que mobilizará preto de vinte propostas até o 19 de xuño.
O concelleiro de Urbanismo, Deportes e Xuventude, Jorge Bustos, presentou unha programación que busca ampliar o impacto da festa máis alá das datas centrais —previstas entre o 18 e o 21 de xuño— mediante unha oferta que combina divulgación histórica, patrimonio, deporte e actividades participativas. Segundo destacou, a iniciativa foi construída coa colaboración de múltiples entidades locais, desde centros educativos até clubs deportivos, colectivos de recreación histórica e o Servizo Municipal de Arqueoloxía.
A programación arrancara xa en abril coa celebración en Lugo da Asemblea Nacional da Asociación Española de Festas e Recreacións Históricas, acompañada dun desfile polo centro urbano e talleres de EcoPercusión en colexios, unha liña de traballo educativa que culminará o 19 de xuño cunha actuación pública na Praza da Soidade.
Historia e patrimonio como eixes centrais
Entre as actividades previstas destaca o reforzo do compoñente divulgativo do Arde Lvcvs, cunha aposta por achegar ao público a dimensión histórica da antiga Lvcvs Avgvsti. Haberá visitas a unha maqueta a escala da cidade romana, percorridos guiados por espazos vinculados á celebración e diversas accións orientadas a reforzar a conexión entre o pasado romano e a identidade contemporánea da cidade.
Neste contexto, Lugo será tamén sede do VIII Congreso Internacional da Sociedade de Estudos da Cerámica Antiga en Hispania, un encontro especializado que reforza a dimensión científica e patrimonial dun evento que, co paso dos anos, foi ampliando o seu alcance máis alá do ámbito festivo.
O deporte súmase á celebración
A programación incorpora tamén o deporte como ferramenta de proxección social do Arde Lvcvs. O Club Baloncesto Breogán e o Club Deportivo Lugo servirán como escaparate promocional en encontros clave fronte ao Bàsquet Girona (16 de maio) e ao Zamora CF (10 de maio), respectivamente. Ademais, o Breogán presentará unha camiseta conmemorativa vinculada ao 25 aniversario.
Esta conexión entre festa e deporte busca ampliar públicos e reforzar a presenza da marca Arde Lvcvs na vida cotiá da cidade durante as semanas previas á celebración principal.
Xogos romanos, escape room e participación cidadá
A vertente lúdica tamén terá peso específico, con propostas como xogos romanos de taboleiro ou un escape room interactivo durante a semana grande, elementos pensados para potenciar a participación directa e diversificar a experiencia do público.
Cambios para 2026: novo Macellum e reorganización de espazos
Durante a presentación, Bustos avanzou tamén algunhas modificacións para a edición de 2026, a do cuarto de século. A principal será o traslado do Macellum, o mercado histórico, á contorna de Santo Domingo e Rúa Raíña, mentres a Praza Maior reservarase para oito postos de recreación histórica.
O interese por participar continúa en aumento: xa se rexistraron 100 solicitudes para 55 postos dispoñibles, superando novamente cifras de anos anteriores. Tamén se reorganizarán os espazos infantís, que pasarán á parte traseira da casa consistorial.
O aniversario pecharase ademais cun concerto especial de Abraham Cupeiro, xa anunciado previamente como unha das citas destacadas da conmemoración.
