O Castro de Esmelle volverá abrir unha xanela ao pasado cunha nova visita teatralizada

A Cátedra de Arqueoloxía e Educación Patrimonial da Universidade da Coruña (UDC) e do Concello de Ferrol volverá organizar este sábado, 23 de maio, unha visita guiada e teatralizada ao Castro de Esmelle, no xacemento arqueolóxico de Tralocastro, nunha actividade que busca achegar á cidadanía o coñecemento do pasado castrexo a través dunha proposta divulgativa e participativa.

A iniciativa desenvolverase a partir das 11.30 horas e enmárcase na celebración do Día Internacional dos Museos, conmemorado o pasado 18 de maio. O obxectivo pasa por converter o patrimonio arqueolóxico nun espazo aberto á participación cidadá, empregando ferramentas que permitan facer máis accesible a historia e a investigación a públicos de diferentes idades.

A nova convocatoria chega despois da resposta rexistrada na edición anterior, celebrada o pasado 19 de abril, que levou aos organizadores a repetir unha fórmula baseada na combinación de explicación histórica, percorrido polo xacemento e elementos de recreación vinculados á vida na época castrexa.

A actividade contará novamente coa colaboración de integrantes da Romaría Castrexa de Esmelle e do Oenach Atlántico, unha cita celebrada en Sedes, no concello de Narón, que obtivo a declaración de Festa de Interese Turístico de Galicia no ano 2014 e que cada verán recrea aspectos da vida e das tradicións das comunidades castrexas.

Desde a organización destacan o carácter divulgativo da proposta, coa intención de aproximar ao público a arqueoloxía, a historia e o patrimonio cultural galego mediante formatos máis dinámicos e participativos. A través da teatralización, os asistentes poderán coñecer de maneira máis directa diferentes aspectos relacionados coa ocupación destes espazos e co modo de vida das comunidades da Idade do Ferro.

O punto de encontro estará situado no local social da Asociación de Veciños de Esmelle, desde onde partirá a actividade. A participación será gratuíta e a organización recomenda acudir con calzado cómodo para realizar o percorrido.

Ademais desta actividade puntual, a Cátedra lembra que tamén existe a posibilidade de concertar visitas guiadas para grupos noutros momentos do ano, unha medida coa que se pretende manter unha programación continuada arredor do patrimonio arqueolóxico local.