Simular o aire, a humidade e os ventos para conservar a Catedral de Santiago e o templo de Santa Eulalia de Bóveda: así funciona o novo proxecto estatal
A Catedral de Santiago e o templo romano de Santa Eulalia de Bóveda, en Lugo, converteranse en dous dos primeiros monumentos galegos nos que se aplicará a tecnoloxía dos xemelgos dixitais como ferramenta de conservación patrimonial. O proxecto, integrado na iniciativa RETECH Knowledge Heritage Network (KHN), contará cun investimento estatal de 225.000 euros destinado ao desenvolvemento de réplicas virtuais capaces de analizar e prever as condicións ambientais que afectan aos edificios históricos.
A iniciativa foi presentada este martes en Santiago coa participación do delegado do Goberno en Galicia, Pedro Blanco, quen destacou o alcance da aplicación tecnolóxica sobre espazos patrimoniais. Segundo sinalou, o proceso de dixitalización impulsado polo Executivo estatal está permitindo “fusionar edificacións tan emblemáticas como a Catedral de Santiago ou o templo romano de Santa Eulalia de Bóveda coa última tecnoloxía en monitoreo”.
O sistema baséase na creación dunha réplica virtual dos edificios, alimentada por datos reais recompilados durante os traballos de restauración e mediante modelos computacionais avanzados. O obxectivo é recrear e analizar o comportamento do interior dos inmobles en función de diferentes variables ambientais.
A través deste sistema realizaranse simulacións continuadas sobre factores como a humidade, a temperatura, os fluxos de aire ou a ventilación, o que permitirá estudar como afectan ao estado de conservación dos materiais. Tamén se introducirán elementos externos como a orientación dos inmobles ou a influencia dos ventos atlánticos no caso compostelán.
A información xerada permitirá desenvolver un modelo predictivo co que anticipar posibles situacións de risco para o patrimonio histórico e deseñar medidas preventivas antes de que aparezan danos nos edificios. Os responsables do proxecto apuntan ademais á posibilidade de estender estas metodoloxías a outros inmobles históricos no futuro.
Durante a presentación, Pedro Blanco aproveitou para facer balance doutras actuacións relacionadas coa transformación dixital desenvolvidas na cidade de Santiago. Segundo explicou, só desde a Secretaría de Estado de Dixitalización e Intelixencia Artificial destináronse case 20 millóns de euros á cidade, repartidos entre programas como Kit Digital, Kit Consulting e as Oficinas Acelera Pyme. Estas actuacións, segundo indicou, permitiron conceder máis de 2.700 axudas, cun importe próximo aos 12,5 millóns de euros.
O delegado tamén destacou os investimentos vinculados ao desenvolvemento de competencias dixitais e á formación especializada, con máis de 100.000 euros destinados á cidade, orientados tanto a formacións básicas como a programas avanzados relacionados coa intelixencia artificial.
O proxecto KHN forma parte das Redes Territoriais de Especialización Tecnolóxica (RETECH), unha iniciativa promovida polo Ministerio para a Transformación Dixital e da Función Pública coa intención de impulsar proxectos tecnolóxicos adaptados ás capacidades específicas de cada territorio.
Galicia participa actualmente en tres iniciativas RETECH: Knowledge Heritage Network (KHN), Optimización das cadeas de valor en IA en sectores estratéxicos e Ecosistemas de emprendemento para desenvolver xemelgos dixitais, que recibiron en conxunto 16,1 millóns de euros de financiamento estatal dentro dun programa nacional superior aos 200 millóns de euros.
Pola súa parte, o director da Axencia Española de Supervisión da Intelixencia Artificial (AESIA), Alberto Gago, destacou durante a xornada divulgativa que este tipo de proxectos reforzan o compromiso coa dixitalización e coa protección do patrimonio, sinalando que a tecnoloxía constitúe “unha ferramenta clave para afrontar os retos patrimoniais do presente e do futuro”.
