O balneario esquecido do Incio volve abrir a súa memoria a través da Semana do Patrimonio Invisible

As antigas augas medicinais da Ferrería do Incio, declaradas de utilidade pública en xaneiro de 1884, volveron recibir visitantes dentro da Semana do Patrimonio Invisible, unha iniciativa promovida pola Vicepresidencia da Deputación de Lugo que busca achegar á cidadanía espazos pouco coñecidos ou de difícil acceso da provincia.

A actividade permitiu recuperar, aínda que só fose por unhas horas, a memoria dun enclave que chegou a formar parte dos circuítos termais máis coñecidos de Galicia e que hoxe permanece practicamente sen uso. O manancial, situado a arredor de 1,5 quilómetros do núcleo da Ferrería, conserva aínda a pegada dunha etapa na que as súas augas atraían visitantes en busca de tratamento e descanso.

As persoas participantes na visita puideron coñecer a historia do lugar acompañadas por un guía especializado e pola veciña María Aurora Vide, unha das voces que mellor conserva a memoria viva do antigo balneario. Vide comezou a “dar as augas” cando tiña só 11 anos, unha tarefa vinculada ao funcionamento cotián deste tipo de establecementos termais e que lle permitiu ser testemuña directa do período de maior actividade.

Máis información en El Progreso