Pepe do Fieiro ao pe da Cabana das Chozas, outro dos refuxios dos guerrilleiros republicanos na Guerra Civil / QPC

Na procura de novos refuxios de guerrilleiros republicanos no Monte Pindo

Hai uns días dábamos conta da Cova da Pendente, no Monte Pindo, un lugar de moi difícil acceso e no que estiveron refuxiados guerrilleiros republicanos durante e despois da Guerra Civil. Non é o único caso. O certo é que no Monte Pindo houbo máis covas onde estiveron agochados moitos dos fuxidos da comarca. A dificultade orográfica do lugar e a cantidade de acubillos do monte axudaron a este propósito.

Outro destes refuxios foi a Cabana das Chozas. Novamente, o veterano Pepe do Fieiro acompañou a Modesto García Quintáns que é quen dá conta na súa sección no QPC destes lugares esquencidos, pero que forman parte da memoria colectiva dos galegos. A Cabana das Chozas está situada no lateral norte do Castelo Pequeno e á uns 200 metros ó norte do Pico de Peñafiel. Para chegar hai que saír do Lugar de O Fieiro polo sendeiro de Peñafiel. Ó chegar ó Rego de Sancheferro cruzámos a pontella coñecida como Ponte das Chozas.

Localización da Caverna das chozas, no Monte PIndo, onde se ocultaron guerrilleiros / QPC

Ponte de canteiros

Os veciños chamábanlle Os Pasales de Arcos xa que no ano 1950, coas obras da Ponte do Ézaro, os canteiros de Arcos construíron esta ponte e trazaron un novo sendeiro por ser máis cómodo e máis corto nos seus viaxes diarios. A uns 70 metros augas abaixo está o Muíño de Louro, ben coñecido polo veterano Pepe do Fieiro, que conta que Xan de Louro (familiar), unha vez regresado de Cuba, construíu este muíño sobre o ano 1927.

Subimos pola primitiva calzada e ao chegar ós Petóns das Chozas xiramos á dereita ata encontrar unha fonte con auga permanente coñecida como A Fonte das Chozas. Esta paraxe é de terreo fértil de moito pasto para o gando polo que cabe pensar que o nome de “Chozas” foi sacado polos primitivos pastores. Na actualidade, tanto o sendeiro como a fonte están totalmente cubertos de toxo, terreo preparado para outra queima en calquer verán.

Interior da Caverna das Chozas, no Monte Pindo / QPC

Unha gran cova

Neste punto, mirando cara ó suroeste e a uns 70 metros vemos uns “outeiros” con formas caprichosas. Alí encóntrase a “cabana”. Está baixo unha enorme plancha granítica duns 8 metros de longo por 5 metros de ancho e polo lateral oeste ten a entrada formada por unha pequena abertura duns 35 centímetro de alto. Débese entrar a catro patas salvando un pequeno chanzo. No seu interior é como un salón duns 30 m2, cunha altura central de 1,5 m. e inclinado cara ó norte.

Está amurallado por un lateral e o chan foi acondicionado. Apenas se nota humidade. Iso indica a importancia que este refuxio tiña entre os guerrilleiros e que non era un lugar puntual. Con todo, non hai que esquencer as penurias que eses homes pasaron polo monte e a estancia nestas covas.

 

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

2 Respostas

  1. Nieves di:

    Hola, paréceme moi ben que incluiades este artigo no voso blog, e da man de QPC Que pasa na Costa, pero tamén poderíades dicir nalgún lado que este artigo foi escrito por Modesto García Quintáns, e publicado efectivamente en QPC. Xa puxen antes un comentario, pero debiuse “borrar”, polo que aproveito para engadir máis datos.. Tanto as fotos como ese croquis de situación da cova son de Modesto. Non cabe dúbida da colaboración de Pepe do Fieiro, e, de feito, foron os dous xuntos nese percorrido, como outros tantos que fan polo Monte Pindo.

A %d blogueros les gusta esto:

Informe de erros

O seguinte texto será enviado aos nosos editores: