Descuberto un dos conxuntos pictóricos prehistóricos máis importantes do noroeste peninsular
A equipa de Sputnik Labrego e Estela Arqueoloxía e Patrimonio SL, coa colaboración de membros da Comunidade de Montes de Casaio, acaban de documentar un dos conxuntos pictóricos máis importantes do Noroeste Peninsular. A Dirección Xeral de Patrimonio confirma a importancia do achádego.
O achádego produciuse no contexto do proxecto dirixido por Carlos Tejerizo (Instituto de Ciencias del Patrimonio, CSIC) e Alejandro Rodríguez (Universidade de Santiago de Compostela) relacionado ca análise arqueolóxica da guerrilla antifranquista e da minaría do wolfram na zona de Casaio.
“No proceso de documentación dun chozo da guerrilla situado nun abrigo con condicións ideais para a presenza deste tipo de arte, revisamos a cavidade e observamos unhas pinturas que enseguida asociamos a momentos prehistóricos”, afirma Francisco Alonso, da empresa Estela Arqueoloxía e Patrimonio SL, que colabora co proxecto Sputnik Labrego. “Enseguida dimos parte á Dirección Xeral de Patrimonio Cultural para que confirmasen o achádego”, engad.
Nunha visita ao sitio producida esta semana, José Manuel Rey, especialista en arte rupestre e director do Parque Arqueolóxico da Arte Rupestre de Campolameiro (Pontevedra), dependente da Dirección Xeral de Patrimonio Cultural, confirmou a importancia do descubrimento.
“Nas primeiras visita localizamos polo menos unha quincena de pinturas de diferentes tipos, dende soliformes até o fantástico ídolo oculado, o primeiro documentado na Galiza”, describe Francisco, ” Todo parece indicar que nos movemos nun horizonte Calcolítico polos paralelos coñecidos, mais que haberá que confirmar no futuro”.
Conservación e investigación
A equipa de Sputnik Labrego, composto por por Mario Fernández (USC), Laura Martínez (Patrimonio Minero del Noroeste Peninsular) e Celtia Rodríguez (USC) xa puxeron en marcha unha proposta de proxecto integral e multidisciplinar para a documentación das pinturas así como para a prospección intensiva da zona, na busca de máis conxuntos.
“Todo parece indicar que non se trata dun único conxunto presente na paisaxe”, afirma Carlos Tejerizo. Este proxecto realizarase en colaboración ca Comunidade de Montes de Casaio, “Estamos moi agradecidos ás veciñas e veciños de Casaio, especialmente a Francisco Álvares e César Real. Sen o coñecemento exhaustivos do territorio por parte da comunidade local, tería sido imposíbel localizar este conxunto”, comenta Carlos.
