A merca dun dos grandes conventos de Pontevedra faise inminente
Unha compra “para conservar o patrinomio” e co fin de evitar a degradación e a perda dun ben patrimonial de gran importancia situado no centro urbano. Así definía Xaquín Moreda, concelleiro de Urbanismo e Patrimonio Histórico de Pontevedra, os últimos pasos da negociación para a compra por parte do Concello do convento de Santa Clara da cidade.
O concelleiro anunciou o pasado día 27 que as negociacións“están moi avanzadas” e que sigue habendo “bo entendemento entre todas as partes”. O concelleiro informou do estado da negociación a todos os grupos da corporación no marco da Comisión do Territorio, Urbanismo e Medio Ambiente, na que tamén avanzou que a operación conta co visto bo e a autorización da Consellaría de Cultura da Xunta.
Unha negociación pendente de pequenas cuestións
Porén, Moreda explicou que todo o proceso estase a levar “con discreción” e que “se seguirá levando con discreción” ata que a operación estea pechada, pero xa adiantou que “pola nosa parte non hai volta atrás”. Pero hai algunhas cuestións que aínda están a negociarse neste momento coa congregación, que abandonou o convento por falta de monxas o pasado ano.
Entre as cuestións que se están a negociar está o posible traslado dun pequeno cemiterio de monxas no xardín do cenobio ou o destino de elementos mobles protexidos como son os retablos. Neste último caso o concelleiro apuntou que as opcións son diversas, como por exemplo a venda ou a cesión en depósito. Tamén que algunhas destas opcións estarán obviamente suxeitas a autorización por parte da Consellaría de Cultura, como no caso de que fosen retirados do seu emprazamento orixinal.
Unha xoia patrimonial que precisa rehabilitación pero en moi boas condicións
Así, dende o Concello afírmase que a decisión de seguir adiante co proceso de compra foi firme tras a visita, o pasado mes de decembro, dun amplo equipo formado por persoal técnico municipal. O obxectivo da visita foi, en palabras de Xaquín Moreda “evitar sorpresas e descartar fallos de construción ou estruturais”. Os técnicos comprobaron que o edificio está en boas condicións, precisa rehabilitación pero que non presenta nin problemas de humidades e nin nos muros de carga.
Así, por parte do Concello, como se afirma existe sintonía para a compra. Tras ele entraría en xogo unha nova fase na que se decidiría o destino do inmoble e outras posibilidades relativas á entrada doutras entidades no seu mantemento, sempre baixo obxectivo da súa conservación. Así este convento gótico, unha das xoias deste período na cidade, pasaría a formar parte do patrimonio público dun dos centros históricos máis mimados e mellor conservados de Galicia.