Queres coñecer este verán un dos centros históricos mellor conservados de Galicia?
“Se ben existen moitas formas de coñecer unha cidade, percorrerla cun guía pode ofrecernos unha perspectiva moito máis completa”. Afirmábao así Yoya Blanco, concelleira de Promoción Económica e Turismo do Concello de Pontevedra, na presentación das visitas guiadas deste 2021 polo centro histórico da cidade.
E é que Visit Pontevedra organizará este verán visitas guiadas con varias opcións, tanto para adultos como para os máis pequenos. Entre elas destacan visitas nocturnas, ó Camiño de Santiago ou ás pontes que atravesan o río Lérez. Entre as novidades deste ano inclúese unha xincana-taller gratuíta para nenos e nenas de entre 5 e 12 anos.
Tal e como indicou a edil socialista do Concello, “nas visitas organizadas e patrocinadas polo Concello de Pontevedra só traballamos con guías oficiais de Turismo, percorrendo a cidade e visitando o interior dos edificios e monumentos sempre que sexa posible; dando a coñecer todo tipo de elementos culturais, históricos, monumentais, gastronómicos e festivos vencellados a Pontevedra, e narrando unha morea de anécdotas e lendas”.
Todas elas cumpren ademais estritamente coa lexislación local e as recomendacións sanitarias en materia de protección e seguridade contra a Covid-19, con grupos reducidos e guías que teñen formación específica en protocolos de actuación e manuais de boas prácticas para a prevención de riscos. Haberá tomas de temperatura ó inicio da ruta, achega de xel hidroalcohólico e con uso de mascarilla obrigatorio durante toda a visita.
