Asalto ó castelo / foto vimianzo.es

Queres coñecer todos os segredos do Castelo de Vimianzo ao longo dos séculos?

O castelo de Vimianzo ao longo dos séculos“. Ese é o nome que leva o simposio sobre o castelo de Vimianzo que se celebrará entre o venres 28 e o sábado 29. Será a primeira vez que diferentes expertos investigadores poidan achegar diversas perspectivas e completar o relato histórico da fortaleza soneirá.

O venres á tarde inaugúrase o simposio coa conferencia de Xosé María Lema Suárez, que escribiu co finado Roberto Mouzo o primeiro e único libro monográfico sobre “O castelo de Vimianzo e os Moscoso de Altamira”.

O sábado a xornada estruturase en diferentes bloques temáticos. A mañá céntrase no período medieval da fortaleza, con visita ao propio monumento e descuberta dos seus segredos. Na tarde falarase de memoria histórica, dos sucesos acontecidos en 1936 durante o período no que o castelo foi propiedade municipal trala expropiación e acto simbólico do goberno municipal republicano, e a posterior represión exercida polos franquistas.

O terceiro bloque centrarase na xestión patrimonial, nas actividades actuais e proxectos de futuro para o castelo de Vimianzo. A xornada remata cunha velada nocturna no patio de armas gozando do fermoso espectáculo teatral e musical de Tero Rodríguez e o grupo musical Barahúnda, en memoria das vítimas do 36.

Xosé María Lema Suárez, xunto co alcalde de Vimianzo Manuel Antelo, a concelleira de Cultura Marta Rey e o técnico de patrimonio Manuel Rial, presentan unhas xornadas sobre o castelo de Vimianzo

Música e degustacion de produtos

O simposio complétase cunha exposición fotográfica do material achado no foso do castelo tras un derrubamento accidental do muro leste. Este ano depositáronse as pezas no museo arqueolóxico de San Antón da Coruña, e grazas á súa colaboración poderanse ver as reproducións da cerámica de luxo e común atopada, armas de ferro…

Durante o simposio poderanse degustar diferentes produtos locais inspirados no castelo, desde as sobremesas até a gastronomía medieval posta en valor polo Concello de Vimianzo e recuperada para a hostalería.

O simposio está aberto a todo tipo de público, desde estudantes, profesorado, a todo tipo de curioso sobre a historia medieval, a memoria histórica, a literatura do Rexurdimento ou a xestión patrimonial. A inscrición é gratuíta e xa se pode realizar a través da páxina web www.vimianzo.gal. Para máis información pódese chamar ao 981 716 001.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Informe de erros

O seguinte texto será enviado aos nosos editores: