Esqueleto atopado na escavación do Castro de San Lourenzo / remitida

Atopan un esqueleto altomedieval case completo na escavación dun castro na Pobra do Brollón

Tempo de lectura: 2 min.

Un esqueleto altomedieval practicamente completo en moi bo estado de conservación foi descuberto nunha nova campaña arqueolóxica do Castro de San Lourenzo, Cereixa (A Pobra do Brollón). Os restos poderían pertencer a unha muller e estarían datados, a falta da proba do Carbono 14, entre os séculos XI ou XII.

‘A lei de Murphy é implacable. Levabamos case un mes de campaña. Pero é sempre nos últimos días dunha campaña cando sae o máis espectacular’, declarou Xurxo Ayán, director arqueolóxico e investigador do Instituto de História Contemporânea da Universidade de Lisboa.

No lado norte dos restos da igrexa medieval estaba a monumental tumba do esqueleto. Estes restos súmanse aos do famoso Atilano da campaña do ano pasado, mais o novo individuo está moito mellor conservado; os ósos están máis enteiros e achegarán máis información. 

Esqueleto altomedieval atopado no Castro de San Lourenzo / remitida

Ósos cheos de datos

O esqueleto atopouse nunha tumba de lousas, sen enchido de terra. ‘Neste tipo de tumbas créase un espazo baleiro que propicia a conservación dos restos,’ explica a antropóloga física Candela Martínez. Ao levantar a primeira lousa xa se albiscou un cranio perfectamente conservado, con dentadura incluída. Conserva, ademais, os coxais (da zona da pelve) e outras partes.. Martínez, nunha valoración moi cautelar, apunta a unha muller aínda que di que hai que agardar as datacións do Carbono 14.

O Castro de San Lourenzo

O Castro de San Lourenzo é un castro mineiro romano que foi reocupado e desocupado en sucesivas ocasións no medievo como centro relixioso. O castro ten unha localización estratéxica con gran control visual sobre os arredores e en plena ruta xacobea do Camiño de Inverno. 

Esta campaña arqueolóxica trátase da quinta campaña que se desenvolve no castro. Baixo a dirección de Ayán, o equipo de tres arqueólogos, unha antropóloga e 14 voluntarios do campo de traballo escavan unha igrexa e necrópole medievais no recinto do castro. Está promovida pola asociación veciñal da parroquia, o Concello da Pobra do Brollón e a Universidade de Lisboa, coa participación dun campo de traballo internacional subvencionado pola Dirección Xeral de Xuventude da Xunta de Galicia.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar.

Pode que che interese...

Deixa unha resposta

Informe de erros

O seguinte texto será enviado aos nosos editores: