Cortan centos de árbores autóctonas na Ribeira Sacra, seis meses despois de asinar un Pacto pola Paisaxe

Unha corta de centos ou milleiros de árbores autóctonas, moitas delas centenarias, promovida pola Xunta e financiada pola Unión Europea. Esta é a última catástrofe ambiental e paisaxística na Ribeira Sacra, candidata Patrimonio Mundial pola UNESCO, que foi denunciada nos pasados días pola asociación Amigas das Árbores da Limia.

A corta masiva, na que non se está a diferenciar nin por nin especie nin por idade, nin por porte das árbores, está a desenvolverse no concello de Castro Caldelas, na Ribeira Sacra Ourensá. O obxectivo, desenvolver unha concentración parcelaria, promovida pola propia Xunta de Galicia e co cofinanciamento da Unión Europea ó 75% programa 2014-2020 FEADER medida 43.

Esta nova corta masiva no corazón desta zona de Galicia, candidata a Patrimonio Mundial, súmase a outras desfeitas ambientais e patrimonias acontecidas ó longo dos últimos anos na zona, como varias cortas indiscriminadas, danos irreparables no mosteiro de San Pedro de Rocas, o proxecto para a instalación dunha tirolina nos canóns ou mesmo a venta por pedras dun convento. Así, esta última agresión, para moitos podería ser mesmo un punto de inflexión para a candidatura.

Tan só seis meses despois do Pacto pola Paisaxe

A corta prodúcese, ademais, menos de seis meses despois de que a Consellería de Medio Ambiente, a Federación Galega de Municipios e Provincias (Fegamp), o Consorcio de Turismo da Ribeira Sacra e un total de 21 Concellos da zona, asinaran e promocionaran un Pacto pola Paisaxe. No convenio afirmábase que se impulsarían accións para velar polos valores naturais e patrimoniais desta zona de Galicia.

O convenio contaba cun orzamento de 550.000 euros, que serán achegados pola Xunta de Galicia e formaría parte do o Plan de Acción para a Ribeira Sacra. Trataríase dunha “estratexia de actuación ambiental e de ordenación do medio físico” da zona. Porén, a realidade é que carballeiras, bidueirais ou bosques de ribeir están a desaparecer, sen diferenza e en tabula rasa neste momento, tal e como denunciaron varias asociacións ambientais.

Desfeita natural na Ribeira Sacra / foto Amigas das Árbores de Ourense